Kinsa man sa 2016?

Dakong tahas ang nagpaabot sa mga Filipino samtang nagkaduol na ang tuig 2016. Kini mao ang pagpili sa atong sunod nga presidente sa nasud.

Sa kapin 125 ka maayong nahimo sa administrasyon ni Presidente Noynoy Aquino, ang pangutana sa katawhan, labi na sa mga botante, kinsa man ang takos nga mohulip kaniya nga makapadayon sa mga kalampusan nga naangkon sa nasud.

Padayon ang pagpangita og maayo’ng ipuli ni Noynoy luyo sa kanunay nga pagtumaw sa susamang mga bansagon. Ang usa gilambigit sa kurapsyon sa dihang mayor pa sa iyang siyudad.

Ang usa anak og usa ka diktador. Ang usa banggiitang senadora apan kwestyonable ang panglawas. Ang usa nag-ambisyon nga mahimong pangulo sa nasud apan ubos ang ratings o nipis ang kahigayonan nga modaog.

Mitumaw usab karon ang pangalan ni Kongresista Lenny Robredo nga standard bearer sa 2016 presidential elections. Ang grupo sa mga kongresista nga ubos sa Liberal Party, masaligon nga makaparang si Robredo ni Vice President Jejomar Binay kinsa adunay 41% nga popularity rating sa mga botante pagka-presidente. Kini ang hinungdan nga nangita ang administrasyon og tawo nga adunay charisma, integridad, kalidad sa pamunoan ug kaligdong nga moparang sa mas lapad na og kasinatian sa pangagamhanan nga Binay.

Ang pangalan ni Robredo ang sibaw karon nga modala sa tingog ug prinsipyo sa administrasyon. Abogada ug asawa ni kanhi DILG Secretary Jesse Robredo, ug kampiyon si Leny sa iyang kawsa pagpanlaban sa mga mag-uuma.

Nahimong bantog ang iyang ngalan sa kongreso tungod sa iyang giduso nga mga balaudnon nga may kalabutan sa transparency ug maayong pang-gobiyerno. Sikat si Robredo sa iyang prinsipyo sa pagdumala sa katungdanan ubos sa tulo ka butang.

Ang tataw nga pagduma, ang paghatag og katungod sa mga opisyal sa gobiyerno nga manubag sa ilang mga lakang ug labaw sa tanan ang paghatag sa mga tawo sa katungod nga manginlabot.

Nagtuo si Robredo nga dili magmalampuson ang usa ka gobiyerno kon dili iapil ang mga tawo sa tanang proseso sa pagdumala sa nasud.

Apan aduna pay igong panahon aron motumaw ang mga pangalan nga motubag sa pangutana kinsa ang mangulo sa nasud human sa eleksyon sa 2016. Ug samtang nagpaabot kita sa mosunod nga piniliay, mas maayong mag-ampo ug mangayo sa tabang sa kahitas-an aron mahatagan kita og tukmang lider nga mangulo sa nasud.

Usa lang ang pangalan ni Robredo nga nitumaw ug angayan nga tan-awon ug susihon pag-ayo. Ang labaw nga hagit  mao ang pagpangita sa posible pa nga mga tawo nga atong kapilian.

* * *

Email: [email protected] or ricolucena@ilovecomarts