Mga abusado

Dalaygon g’yud kaayo ang gihimo sa guwardiya sa usa ka balay-patigayon didto sa dakbayan sa Talisay nga nagpakamatay paglaban sa iyang gibantayan. Ingon niana man g’yud ang panarbaho. Ang guwardiya sama ra sa polis nga dili na nato ikahibulong nga moabot ang higayon nga siya mapatay kon dili man siya ang makapatay sa mga badlongon sa katilingban.

Samtang nagkaisog karon ang mga tulisan sa ilang pagpanulis nga mopatay na g’yud og tawo, ang mga security guard angay na gayud nga magbantay ug mangandam kanunay.

Apan pastilan, makadaghan na ako makabantay nga ang armas sa ubay-ubay’ng mga guwardiya nga kon duna may bala, pipila ra kabuok. Tayaon pa g’yud nga mora’g dili ka makasiguro kon mobuto ba.

Ambot naunsa ang mga sakop sa FESSAGS nga wala man magtan-aw niini nga punto. Wala gani sila mohimo’g aksyon niini’ng mga security agency nga nagtinil og “duplicated” nga mga armas. Unsa wala mo kahibalo niini?

Kon wala mo kahibalo mas maayo pa’g mangatulog mo. May gikahinabi ko nga guwardiya ug gitug-anan ko nila sa ilang problema. Daghan sa mga guwardiya ang dili mosukol kay dili sila makasugakod sa mga armas sa tulisan.

Ang guwardiya nga makalitan pag-abot sa mga tulisan ug makakita sa nindot nga armas sa mga tulisan, dili na lang magpatuga-tuga kay sigurado sila nga matipi. Aw tan-awa og unsay nahitabo sa guwardiya sa Talisay.

* * *

Ang lagda sa Commission on Audit (COA) mao nga ang tanang sakyanan sa kagamhanan markahan gayud ang kilid og FOR OFFICIAL USE ONLY, unya “red” ang iyang plate numbers.

Apan ngano man nga si Kapitan Dante Tabucal sa Barangay Sudlon 1, bukid ni nga barangay sa dakbayan sa Sugbo, nagsakay-sakay man sa iyang City Hall service vehicle nga Toyota Innova (SHM-349) nga walay marka?

Akong gipahibalo niini si Mayor Michael Rama ug gipasaligan ko nga iyang pahinumdoman si Kapitan Tabucal sa lagda sa COA. Isip kapitan sa barangay, si Tabucal unta magsilbi nga ehemplo ug dili kay mag-una-una sa pagpangabuso.

Unya, kini ang giisyohan niini’ng sakyanan, usa ka itom nga Mitsubishi Strada (SKZ-968) nga sakyanan? Sigurado ko nga ang nagmaneho niini kaniadto’ng Lunes sa alas 9:45 sa buntag, dili ang giisyohan niini.

Walay angay nga nagmaneho sa sakyanan ang drayber. Ingon niini ang nahitabo. Stop na ang signal sa mga sakyanan nga gikan sa Salinas Drive apan ang itom nga Strada mipaturatoy gihapon ug miilog sa akong agianan.