Ang kahimsog sa kahoy

Ang mga tanom o punoan sa kahoy, daku kaayo ang kapuslanan niini o daghang mga benepisyo ang mahatag niini sa kinabuhi ug sa atong kalikopan. Makapabugnaw kini sa palibot ug makapalab-as sa hangin nga atong hanggapon.

Makatabang usab kini sa paghinlo sa polusyon sa kalikopan. Moprodyus sab kini og oxygen nga mopahimsog sa atong pagginhawa.

Duna kitay nabasahan nga kontrobersiya mahitungod sa mga dagkong kahoy nga basta na lang pamutlon kay kuno daghan nang natumbahan ug nakalas nga kinabuhi. Gipananom kini daplin sa kadalanan aron pagpatahom ug paghatag landong sa mopasilong o moagi ilawom sa punoan. Kaanugon sa kataas sa panahon nga nagproteher kini kanato gikan sa ‘solar radiation’. Sama  ra nga giputol nato ang kinabuhi sa katawhan, ang pagputol sa kinabuhi sa kahoy. Ang tanom may dugong berde (chlorophyll), ang tawo aduna say pulang  dugo.

Kining dugo sa tanom, di lang kini molimpyo sa pollution sa palibot, molimpyo usab kini sa dugo sa tawo, aron mohimsog ang kinabuhi nato. Busa motabang kita sa mga kahoy nga makabato’g himsog nga punoan.

Kon sa palibot may punoan kita sa tugkaran o kadalanan, atong aninawon kon kini anaa ba sa kahimsog. Di kay dauton nga panlansangan, pamintalan ug pamanitan. Makapa-impeksyon kini sa punoan nga mawad-an og mga nutrients o mga sustansya, hangtud magkagabok nga menus na og kusog.

Motabang kita sa pag-monitor, kon may makita kitang punoang wa sa kondisyon, ireport nato sa DA o sa DENR o sa ubang ahensya sa gobiyerno nga adunay tahas o responsibilidad niini, aron kahatagan og tukmang pag-atiman.