EDITORIAL - Bangsamoro experiment

Giduso na ni Presidente Benigno Aquino III ang draft sa balaod alang sa gilantaw nga kalinaw sa Bangsamoro didto sa Mindanao.

Sa pagkakaron, mao kini ang nakita ni Aquino nga labing haom alang sa tanan, bisan pa man sa kadaghan sa mga misupak niini ilabi na sa mga lumad nga mga Kristiyanong taga Mindanao ug ubang grupo sa mga rebeldeng Muslim nga gusto g’yud nga mabuwag ang Mindanao sa Pilipinas.

Sa bag-ong balaod, aduna silay kaugalingong bandila, ipatuman ang Sharia Law sa mga Muslim sud sa teritoryong nasakop sa Bangsamoro ug duna silay kaugalingong 60 ka miyembro sa parliament nga adunay eksklusibong gahom aron palambuon ang agrikultura, negosyo, turismo ug edukasyon.

Mobubo ang gobiyerno ug pundo isip special development funds sud sa lima ka tuig aron dunay magamit ang bag-ong gobiyerno.

Samtang gidayeg kini sa uban ug sa international community kay matapos na gyud ang kapin kwarenta ka dekadang rebelyon nga mikalas og 150,000 ka kinabuhi, kinabag-an sa Mindanao ang dunay pagduda niini ilabi na sa mga probinsya sa mga Kristiyano.

Ang paglambo sa Mindanao gidamgo g’yud sa tanan, Muslim, Kristiyano ug mga Lumad. Kon pinaagi niini makab-ot ang maong damgo, angay g’yud hatagan og kahigayonan ang kalinaw. Dili angay mabalaka nga mabuwag ang Mindanao sa Pilipinas, tungod kay dili kini mahimo gumikan kay mas lapad ug mas daghan ang mga probinsya niini nga dili gustong mabuak ang Pilipinas.

 Sama sa pakyas nga Autonomous Region on Muslim Mindanao (ARMM), ang Bangsamoro entity maisip gihapon nga usa ka eskperimento, magbunga lang kini og maayo ang kalinaw kon pugngan kadto nga mga tawong buot nga moguba niini.