EDITORYAL - Pulos nanghunaw

Nausik ang kinabuhi sa tulo ka  tinun-an sa Calagasan National High School sa lungsod sa Argao human nga sila naanod sa kusog nga bul-og sa tubig samtang sila nitabok sa spillway sa sapa sa ilang pagpamauli sayo ning semanaha.Napugngan unta kini kon ang mga stakeholders sama sa lokal nga gobiyerno ug mismo sa mga magtutudlo nangagpas pa lang daan sa posibleng dautang mahitabo  tungod kay nagbunok man ang ulan nianang adlawa.Ang kamatayon sa tulo ka bata dili mahimong walay sad-an nga mabasol. Karon nanghunaw na sila ug dunay kaugalingon nilang mga rason aron lang nga makalikay sa ilang tulobagon ug kunohay mogawas pa hinuon nga naghimo sila sa husto.Una niini, ang officer-in charge sa eskuylahan mirason nga wa siya’y nakitang sayop nga gipapauli ang mga bata alas-4 sa hapon. Mas nabalaka kini nga matabunan ang ilang eskuylahan sa landslide kon mograbe ang sitwasyon.  Apan dakong sayop ang pagpapauli sa mga bata nga way kaubang hamtong.  Nganong wala na lang sila manawag daan sa munisipyo, sa barangay,  o ba kaha sa mga polis ug sa mga ginikanan sa mga bata nga apason ilang mga anak. Sa habig sa barangay officials nga diin masakop ang maong spillway,  sayod na silang daan nga dautan ang panahon apan wa sila nangagpas nga bisan wala magbunok og kusog ang uwan sa ilahang dapit, kusog ang uwan sa kabukiran ug modagayday gyud kini sa ilang sapa. Nagbutang na lang sila og tanod sa spillway niadtong tungora. Pwerte na man untang daghana sa mga memoranda ug mga seminars kabahin sa disaster preparedness pagsigurong way madisgrasya nga mga tinun-an atol sa tingklase, apan nausik lang ang panahon ug kwarta nga gigasto para niini kay wala diay silay nakat-onan.