Maayo pa’g sirad-an

Nakahuna-huna si Mayor Michael Rama nga kanselahon ang business permit nga gihatag sa kagamhanan sa dakbayan sa Sugbo ngadto sa lainlaing outlets sa LBC Express kon dili g’yud sila mokuha og  guwardiya.

Nasayod ko nga mosinta ang tagdumala sa LBC niini nga nahuna-hunaan sa mayor. Apan ngano’ng dili man ‘sab g’yud sila mokuha og guwardiya nga makabantay sa ilang balay-patigayon?

Ngano nga ang mga kakompetensiya nila nga kompaniya duna man lagi guwardiya? Dili ikalimod nga mahal na kaayo ang kontrata sa pagkuha og guwardiya, ilabi na kon adto ka sa mga respitado nga security agency.

Apan kabahin na kana sa operating expenses sa pagbutang og negosyo, ilabi na nga ang ilang pamatigayon naglambigit og kuwarta nga humot kaayo sa mga tulisan.

Ngano nga wala man lagi pangtulisa ang ubang susama nga negosyo? Ang rason kay duna man sila’y mga guwardiya nga gikuha aron mobantay.

Tinuod, makapasikat sa LBC nga ang ilang branches sunod-sunod nga pangtulison kay magbansiwag man ang ilang mga balay-patigayon sa mantalaan, makita sa TV ug dayon        madunggan sa radyo.

Apan luyo sa ilang libre nga propaganda, ang LBC naghatag og bati nga dungog sa dakbayan sa Sugbo. Makita nga dili maayo ang peace and order dinhi sa dakbayan ug ubang bahin sa probinsya kay sagunson lang ang tulis.

* * *

Masabot man nga paglikay sa gasto ang rason sa tagdumala sa LBC nga dili sila mokuha og guwardiya. Ang kontrata sa usa ka guwardiya alang sa walo ka oras nga duty matag adlaw anaa sa P15 mil ang buwan.

Sa ato pa, kon dili sila mokuha og guwardiya, makadaginot ang LBC og P180 mil ang tuig. Bisan pa og ang LBC branch matulis og kaduha o katulo sa usa ka tuig, ganansya gihapon kay kada tulis gagmay ra man og makuha ang mga tulisan.

Nagpasabot nga dili balihon sa tagdumala sa LBC nga sila matulis kay sa mosweldo og guwardiya nga dako kaayo ang ilang magasto. Apan kon ang dakbayan sa Sugbo mokanselar na sa business permit sa mga LBC branches nga walay security guard, bana-bana nako nga mapugos sila sa pagkuha’g guwardiya.

Kinahanglan nga dalion kini nga lakang kay gikulbaan ko nga basin og may lain na usab nga LBC branch nga mabiktima sa pagpanulis dinhi sa dakbayan.

Tiaw mo, gawas nga walay guwardiya guba pa g’yud ang ilang Close Circuit Television (CCTV) Camera. Kinsa nga tulisan ang mahadlok ana?