Akto sa kaisog
Duha ka pundok sa atong kaigsuonan nga Pilipinhon ang mihatag og dakong kadungganan sa atong nasud pinaagi sa ilang kaisog ug dalaygong kaabtik sa natad nga ilang giapilan.
* **
Didto sa Syria, usa sa makuyaw nga dapit sa kalibutan, mga sundawong Pinoy kinsa giila nga UN Peacekeepers, nakigharong sa mga rebeldeng Syriano sa Golan Heights. Maisogon nga mituman sa ilang tahas sa pagpauswag sa kalinaw sa maong dapit.
* * *
Dihang naapiki na ug gimandoan sa ilang Bombay nga kumandante sa pagsurender ug pagtugyan sa ilang armas sa rebelde, misupak sa maong kamandoan ug nakigbatok og pinusilay sa mga rebelde hangtud nakakita’g paagi nga makalingkawas sa makuyaw nga kahimtang.
* **
Akto kadto sa kaisog ug akto sa pagpatigbabaw sa dungog ug ngalan sa nasud nga Pilipinhon. Kini maoy pagtuo sa hapit tanan nga nasayod sa gihimo sa mga sundawong Pinoy lakip na ang mga langyaw’ng tigpaniid.
* * *
Ug didto sa Seville, Spain, ang atong koponan sa basketball nga mao ang Gilas Pilipinas, nakigkombati sa mga banggiitang kaatbang sa FIBA World Cup 2014. Sila maoy giilang David nga nakigharong sa mga Goliat.
* **
Apan ang atong Gilas Pilipinas mipakita og mga dalaygong lihok. Bisan tuod nga napilde sa Croatia, Greece, Argentina ug Puerto Rico, mipakita og labok nga bisan ang kaatbang midayeg kanila -- kanatong mga Pinoy.
* * *
SA LAING BAHIN... Daghang salamat ngadto ni Engr. Nilo Lagrosas sa iyang artikulo kabahin sa iyang pagka-newsboy sa Banat News ug The Freeman sa bata pa siya. Ganahan unta kita mopatik apan taas ra kaayo, Engineer ug wa tay igong espasyo. Congratulations, Engineer, sa bag-o mong katungdanan didto sa Manila.
- Latest
