Clearing sa Kamagayan

Nakabantay ko nga ang pagpangguba sa daghang kabalayan diha sa Barangay Kamagayan miabot na diha sa entrada sa karsada sa dalan D. Jakosalem.

Sa hilom nalipay ko sa mao nga kalamboan. Kaniadto’ng mga dekada 80, dako ug lapad kaayo ang karsada diha’ng dapit paingon na sa City Center Commercial Complex diin mahimutang ang temporaryo nga barangay hall.

Apan sa pagpanglabay sa katuigan, kadto’ng lapad nga karsada gikan sa dalan D. Jakosalem anam-anam nga nawala ug ang nahabilin mao na lang ang hagip-ot kaayo nga agianan, maglisod na gani pag-agi ang mga sakyanan.

Karong gipangguba na ang mga barung-barong, mora’g nindot na kini kay paminaw ko mobalik na unya ang halapad nga karsada diha sa mao nga dapit.

Kon madayon ang plano nga gikan sa P. del Rosario Street tupad sa Barangay Hall karon sa Kamagayan himoan og karsada nga modugtong sa Sanciangko, ug laing karsada nga gikan sa Junquera molapos sa D. Jakosalem, nindot na g’yud unya ang mao nga dapit.

May nangomedya lang hinuon nako. Giingnan ko nga apektado na unya ang akong grupo diha sa Kamagayan nga gitawag og NABUSOG kun Nagkahiusang mga Burikat sa Sugbo. He! He! He!

Dili kay ang prostitusyon lang diha ang momenus-menos kun dili ang pagpamaligya og gidili nga drugas. Karon gud, misiaw ang drug addiction diha kay lapad kaayo ang lugar unya walay karsada.

Unya ang mga balay gubot kaayo, ikaw nga wala maanad kuyawan ka nga basin og dunay mokalit nimo’g dunggab kon mosulod ka diha’ng dapita.

Awhagon nako ang City Hall nga dalion kini nila sa paghawan ang mao nga lugar. Kadtong mga nagpuyo diha mahimong pabalikon gihapon sa pagpatukod, apan ayuhon na pagbahin ang luna.

Sa ingon nga paagi, monindot na ang Kamagayan ug molambo na ang mao nga dapit.

* * *

Husto ang gihimo sa mga lumolupyo sa Sitio Abellare sa Barangay Inayawan nga misupak nga ang kanal sa Sabellano Street, Pardo direkta nga ikonektar ngadto sa kanal nga nahimutang sa ilang dapit.

Ang kanal gud diha sa Sitio Abellare dili man gani makasapar pagsuyop sa tubig karon nga wala pa masumpay ang tubig gikan sa kanal sa Sabellano ug taga tuhod ang paglunop kon kusog ang uwan.

Sa ato pa, kon madugtong na ang kanal gikan sa Sabellano Street, Pardo ngadto sa kanal sa Sitio Abellare, mahimong mosaka pa ang tubig nga maglunop kon may uwan.

Basin gikan sa taga tuhod moabot na sa taga hawak.