EDITORYAL - Pahiluna sa politika
Sibaw na g’yud ang preparasyon alang sa umaabot nga 2016 Elections, gawas sa linabayay og lapok sa potensyal nga magkaatbang, duna nay uban nga mipahimutang na sa ilang kaugalingon sa mga partidong sa ilang tan-aw maoy dumadaog sa sunod nga piniliay.
Dinhi sa dakbayan sa Sugbo, hinay-hinay nga namiya ang mga sakop sa Bando Osmeña Pundok Kauswagan (BOPK) pinangulohan ni kanhi kong. Tomas Osmeña .
Dunay mitapon g’yud sa karibal nga partidong Team Rama ug duna say mipahiluna lang una sa neutral nga posisyon aron maniid una sa panahon.
Ang Team Rama klaro na nga adto suporta ni Bise Presidente Jejomar Binay kinsa gikatakda pang magporma og political party apan maoy gikatahong gituboy nga standard bearer gihapon sa United Nationalist Alliance (UNA).
Daghan ang miingon nga hayag na kaayo ang kadaogan ni Binay sa presidential race kun ang basehan ang mga surveys tungod sa kadako sa iyang labaw sa ratings sa misunod kaniya.
Sa laktod pagka-estorya dunay dakong posibilidad nga makapabor ang mga taga Team Rama unya sa 2016, ug ang mga kaalyado niini maapil usab og kahig.
Samtang ang ubang nangangkong para g’yud kuno sa kaayohan sa ilang mga konstituwente ang ilang gihimong pagbalhin-balhin, apan dili kalikayan nga maisip usab kini nga preparasyon aron dili sila mapunta sa pildihonong grupo.
Sa politika dunay panultihon, mahimong ang kaaway kaniadto imong makaalyado ug ang imong kaalyado mamahimo na nimong karibal. Kinsa man guy mokandidato nga gustong mapildi?
- Latest
