Tunglo sa Manipis

Manipis, Talisay City -- Nibundak ang kusog nga uwan dinhi samtang nangumbinser ang kadagkoan sa barangay ug City Hall sa mga molupyo nga kinahanglan na silang mamalhin sa mas luwas nga dapit tungod sa hulga sa nagpadayong pagdahili sa yuta nga gawas nga nitabon sa pipila ka bahin sa dan nakahulga sab sa hangtod usa ka gatos ka kabalayan.

Way molupyo nga molalis sa pasidaan nga nameligro sila. Apan kasagaran nila nibalibad sa awhag pagbiya sa ilang mga pinuy-anan. Kay ang barangay ug City Hall nangita pa og relocation site alang sa maapektahan nga mga pamilya. Wa pa silay ikatanyag nga alternatibong mga panginabuhi sa mga nanguma ug nangaingin dinhi.

* * *

Giawhag na sang mamalhin ang mga tinun-an ug mga magtutudlo sa Manipis Elementary School. Kansang classroom alang sa mga tinun-an sa Grade 3 naligiran og higanteng bato niadtong Hulyo ning tuiga. Bisan kon kabahin ra sa bungbong nga kawayan ang nabuslot gibalhin nang klase sa mga tinun-an sa stage sa eskuylahan.

Apan way nakitang mas luwas nga luna nga kabalhinan sa eskuylahan ang kadagkoan sa barangay, City Hall ug Department of Education (DepEd). Maong nahukman sa City Hall nga butangan og riprap ang nag-umbaw nga bakilid aron nga di modahili sa eskuylahan. Apan kinahanglan una silang mananghid sa tag-iya sa luna, ang YMCA.

* * *

Samtang nanglugsong mi sa dangog, lapukon ug gibahaan nga Manipis Road, nalabyan mi sa gagmay’ng mga tinun-an nga nanagan pagsungasong sa uwan pauli sa ilang mga pinuy-anan. Giingnan mi nila nga mangabasa gyod sila matag bunok sa uwan. Kon di sila maabtan samtang nagbaktas, mangabasa gihapon sud sa pipila ka classrooms nga busluton ang atop.

Kapait sa kahimtang sa mga molupyo. Tungod sa ilang kalayo ug kakuyaw sa ilang agianan, hasol kaayo ang ilang pagbiyahe alang sa inadlaw’ng panginabuhi, samang dugay silang maabtan sa batakang mga pangalagad sa gobyerno. Padayon silang nagpaabot kanus-a matuman ang hagbay rang saad nga palapdan ug himuong mas luwas ang ilang dan.

* * *

Laing tinubdan sa kabalaka sa kadagkoan sa barangay: Ang padayon nga pagpangubkob sa kabukiran nga naglibot nila mahimong makapasamot sa kahumok sa yutang anapog ug mosangpot sa mas lapad ug mas subsob nga pagdahili nga makababag sa mga sakyanan ug makahulga sa kabalayan.

Matud ni Barangay Kapitan Emma Cabiluna naalarma sila sa kadaghan na sa anapog nga nakubkob, nahakot ug nabaligya sa QM Builders, ang kontraktor sa Manipis Road. Igo lang silang gisaaran nga bahinan sa halin apan wa sila pahibaw-a pila na ka tonelada ang nakubkob gikan sa ilang kabukiran. Ubang mga opisyal sa barangay nagduda nga mas interesado ang kontraktor sa pagnegosyo sa way kinutobang suplay sa anapog sa kabukiran kay sa pagtarung sa dan dinhi.

 [email protected]