EDITORYAL - Giyak-an nga dokumento?

Ipasusi ni Mayor Michael Rama kon unsa nga mga proyekto nga wala dayon mapatuman sa iyang administrasyon kay matud niya “giyak-an” sa pipila ka komitiba sa konseho ang mga dokumento.

Gusto nga pahibaw-on sa mayor ang katawhan nga aduna siya’y buot himuon nga mga proyekto sama sa pagsulbad sa paglunop-baha apan wala pa lang kini mapatuman.

Bisan og dili pa tinuyo ang paglangan sa paghatag og pagtagad sa dokumento apan kon dugay kaayo kini nga wala tagda sa hingtungdang komitiba iya kini nga ipahibalo sa katawhan.

Buot gamiton ni Mayor Rama ang pipila ka konsehal nga alyado sa Bando Osmeña Pundok-Kauswagan (BOPK) apan karon mora’g iya na usab nga nasuod aron mutabang kaniya paghipos og mga detalyi.

Ang pagpahibalo sa mayor nga ang gisugyot niya nga proyekto nalangan kay wala hatagi og paborable nga rekomendasyon sa komitiba sa konseho dili makiangayon gawas kon iya usab nga ibatbat ang rason.

Adunay ubang mga proyekto sama sa drainage systems nga wala mapatuman tungod kay anha kini moagi sa mga pribado nga luna ug wala’y pagtugot sa mga tag-iya.

Kon igo lang ipublikar o ipahibalo sa mayor ngadto sa publiko ang mga proyekto nga wala mapatuman sa iyang administrasyon apan dili ibatbat ang tinuoray’ng rason sa pagkalangan, mahulagway nga dili usab makiangayon sa mga politiko sa kaatbang nga grupo.

Maisip kini nga usa lang gihapon ka pagpamolitika aron gub-on ang iyang mga kaatbang ug aron maglagot ang katawhan kanila, ilabi na niadto’ng mga tawo nga dali ra kaayo motuo.