Politika makadaot sa Lapu-Lapu

Akong pahalipay ngadto sa mga tagdumala ug mga sakop sa Sugbu Brokerage and Allied Services Int’l Inc. nga nagsaulog sa ika-10 nga kasumaran sa pagkatukod niadtong Sabado.

Espesyal nga pahalipay kanilang kanhi Customs Collector Paul Alcazaren, Atty. Ben Bongon ug kanhi Civil Service Commission director Rene Morales. Ang Sugbu Brokerage naa mahimutang sa J.K. Chua Bldg., M.J. Cuenco Ave., ning siyudad.

Gawas sa customs brokerage, usa usab kini ka law firm sa tulo ka abogado. Congratulations!

* * *

Ang politika makadaot sa maayong programa sa usa ka lokalidad. Ang naka-apan niini, ang mga politiko hilig moduwa sa politika bisan mahikalimtan ang kaayohan alang sa kinabag-an.

Mao kini akong kahadlok sa dakbayan sa Lapu-Lapu. Ang Lapu-Lapu ning panahona lisod hitupngan sa mga nahimong mga kaayohan sa katawhan. Nahimo kining numero unong destinasyon sa mga turista dinhi sa rehiyon.

Ang turismo sa Lapu-Lapu maoy usa sa mga factors nga kanunay’ng nabitad pa-ibabaw ang ekonomiya sa rehiyon, ilabi na sa Sugbo. Nanguhong nga mga nindot nga hotel ug beach resorts nga gidagsa og mga internasyonal ug lokal nga mga turista.

Ang mga kalingawan sa mga beach resorts grabe na kanindot. Ang Lapu-Lapu nahimo usab nga “venue” sa mga internasyonal nga mga sports events. Gani, ang Hoopsdome niini mas nindot pa kay sa mga sports centers sa kauluhan.

Ug kining tanan nanaog ngadto sa kaayuhan sa katawhan. Apan kun maghari ang politika, ma-ingon kaha niini ang Lapu-Lapu? Angayang maghiusa ang mga opisyal sa Lapu-Lapu, ipadaplin ang politika aron magpadayon ang paglambo sa isla sa Mactan nga naila sa tibuok kalibutan nga tourist haven.

Niadtong nagsakbang sa pagka-mayor silang Mayor Paz Radaza ug Jun Pelaez gihimong isyu ang red tape ug korapsiyon sa dakbayan. Apan sa dihang nakalingkod si Paz, gipamatud-an niya nga sayop ang mga pamasangil atol sa kampanya.

Milambo ang dakbayan ug misaka ang “investors-stakeholders confidence” ug nagtambayayong ang lokal nga kagamhanan ug mga pribadong kompaniya, ilabi na ang mga hotel ug mga MEPZA locators, sa pagpalambo sa dakbayan.

Atubangan sa 8,000 ka Oponganon sa Hoopsdome, gituki ni Paz ang mga ekonomikanhong kalamposan sa dakbayan, sama sa P17.5 bilyones nga pagpalapad sa Mactan Cebu International Airport nga himuon sa Megawide-GMRC, P30 bilyones nga investment sa Megaworld sa Mactan Newtown complex, ug ang pagsulod sa 11,000 ka patigayon.

Kon apilan og politika, maangkon kaha kining maong mga kalamposan? Hinuon, ang mga hakog nga politiko maglumpayat pagpuli sa renda sa pangagamhanan kun hunahuon nila ang personal nga interes nianang mga kalamposan nga atong gihisgutan.