Pagpasikat ra
Misikat karon dinhi sa Pilipinas ang Amyotrophic Lateral Sclerosis (ALS) Ice Bucket Challenge ug mga politiko ang sagad mikubit niini.
Kining ALS, usa kini ka matang sa sakit sa utok ug may simtoma nga mogahi ang dila sa pasyente hangtod nga dili na makalitok sa gusto niya nga isulti.
Adunay nagpasiugda aron pagtigum og donasyon aron tabangan ang mga biktima apan ang gusto nga mohatag og hinabang salapi ngadto sa grupo sa ALS Ice Bucket Challenge, maligo og usa ka balde nga tubig nga bugnaw kaayo kay gisagolan og ice, una motunol og kuwarta.
Apan peligro kini kon ang donor, masakiton tungod kay malagmit modako ang maong sakit o kaha kon dili madali, peligro kaayo nga mamatay.
Aw hinuon kon diha ra g’yud kutob ang kinabuhi sa usa ka politiko, makapasikat kini kaniya, bisan tua na siya sa lubnganan. Unya unsa may kapuslanan?
* * *
Peligro kaayo ang karsada sa Manipis tungod kay modahili dayon ang yuta ug mga bato kon tinguwan.
Dili kini angayan pa nga lalisan kon balhinon ba ang maong karsada ngadto sa laing lugar o dili.
Ang tukmang solusyon niini mao ang pagsira sa maong karsada kon tinguwan aron wala’y mangamatay.
Ang karsada sa Naga, San Fernando ug Carcar, gihulga sa mga kahoy nga malagmit matumba ug mokalas og kinabuhi.
Kay milampos man ang mga environmentalist pagpugong sa pagpamutol sa mga kahoy, angay balhinon ang maong karsada.
- Latest
