Hugti ang lit-ag

Human sa pagkasikop ni retired general Jovito Palparan didto sa kaulohan, kinsa na usab kaha ang sunod nga mahulog sa kamot sa balaud. Aduna pay dagha’ng high-profile nga mga wanted kinsa pabilin nga gawasnon.

Kini sama ni Ruben Ecleo, ang kanhi kongresman ug mayor sa isla sa Dinagat didto sa Surigao. Kahinumdoman nga si Ecleo nakonbikto gumikan sa pagpatay sa iyang asawa nga si Alona dinhi sa dakbayan sa Sugbo.

Usa kadto sa mga sensational nga kaso sa Sugbo. Ug nahimo kadto nga kontrobersiyal gumikan kay dagha’ng kinabuhi ang nadamay gikan pa sa pagdakop ni Ecleo hangtod na sa iya’ng pagkakonbikto.

Apan, sa nagdagan pa ang iya’ng kaso, naka-score og dako si Ecleo. Kini sa diha’ng gitugotan siya sa korte nga makapiyansa. Maayo nga pagkakumbinse sa iya’ng abogado ang husgado nga usa ka “walking time bomb” kuno ang mao’ng akusado ug angay lamang nga hatagan og temporaryo nga kagawasan.      

Karon, human sa iya’ng pagpiyansa, wala na gayud nahibalik sa prisohan si Ecleo. Aduna untay warrant of arrest nga gipagawas ang Sandiganbayan batok kaniya gumikan sa kaso nga graft. Apan iya kini nga gilihayan.

Ug hangtod karon, pabilin nga nagtago ang lider sa Philippine Benevolent Missionaries Association gikan sa otoridad. Daghan ang nagtuo nga tua kini nagtagotago sa Mindanao nga maoy balwarte sa PBMA.

Sulod sa pipila ka tuig na niya nga pagtago-tago, mora og nahawngan gayud ni Ecleo ang otoridad. Unsa kaha iya’ng bertud ngano nga wala gayud makatimaho ang kapulisan sa iya’ng gitagoan.

Kini tungod ba kaha sa tabang sa iya’ng liboan ka mga sumusunod sa PBMA nga nagkatap karon sa nasud? Hinuon dili gayud kana kalikayan.  Kini tungod kay sama sa usa ka Ginoo ang ila’ng pagtan-aw kaniya.

Apan niini’ng padayon nga pagtago-tago ni Ecleo, kulang usab ang hustisya sa kamatayon ni Alona. Sukad sa iyang kamatayon niadto’ng 2002, hagbay ra’ng nangita sa hustisya ang iya’ng pamilya.

Kon kanus-a mahulog sa kamot sa balaud ang kanhi mayor ug kongresista, depende kana sa panahon. Hinuon trabaho sa otoridad ang pagpahugot sa ila’ng operasyon aron nga, sa katapusan, mabitik gayud sa lit-ag si Ecleo.