Leksyon ni Cernio

Dili na bag-o alang kanako nga adunay mga opisyal sa kapolisan nga mogamit og mga sakyanan nga ilang ma-recover gikan sa mga nalambigbit sa krimen.

Daghan g’yud kini sila, dili kay si Chief Inspector Noli Cernio lang. Diha’ng deputized pa ko kaniadto sa Land Transportation Office (LTO) daghan g’yud nga sakyanan sa  polis nga among  gipang-impound.

Ang rason kay daghang polis nga among nasakpan nga walay papeles ang ilang sakyanan ug klaro kaayo nga “recovered vehicles” ug ila ra nga gigamit-gamit, sagad niini mga motor.

Usa sa sagad nila rason, giilisan kuno nila ang plate numbers kay gigamit nila ang sakyanan sa “surveillance operation.” Tell that to the dead marines. Wala tingali masayod kini’ng mao nga mga polis nga wala pa sila mahimong polis, nahimo na ko’ng police/military reporter mga 11 ka tuig.

Kabisado kaayo nako ang pamaagi sa kapolisan, apil ang tinonto sa pipila nila ka kaubanan.

* * *

Balikan nato ang kaso ni Chief Inspector Cernio. Klaro kaayo nga nakahimo siya’g kasaypanan kay ang sakyanan “recovered” sa mga sakop sa Theft and Robbery Section sa Cebu City Police Office.

Si Cernio nahimo’ng hepe sa TRS apan ang sakyanan nasakmit diha nga dili pa siya ang hepe. Ang uban nga mga nangaging hepe sa TRS migamit ‘sab sa sakyanan, apan wala nila dad-a diha’ng gibalhin sila og lain nga katungdanan.

Apan si Cernio, gidala niya ang awto, kon wala ko masayop 2000 model nga Mitsubishi Lancer, diha nga gibalhin na siya gikan sa TRS ug mao na ang hepe sa Punta Princesa Police Station.

Pastilan, ang mga polis makahimo pag-loan og P200 mil, ug kon opisyal mahimo pa gani tingali nga subra pa, apan gidaginot pa g’yud ni Cernio ang mao nga sakyanan.

Wala g’yuy motuo sa pangangkon ni Cernio nga gipaayo kuno niya ang sakyanan ug giplano niya’ng iuli kon hingpit na nga mamaayo. Natukma g’yud no nga pagbuto sa isyu, nahuman og ayo kay giuli man niya niadto’ng Huwebes sa buntag?

Na hala, tubaga na lang ang imbestigasyon Chief Inspector Cernio Sir. Duna ra ba’y kaso sa Ombudsman nga akong nabasahan nga ang usa ka opisyal sa polis didto sa Manila gitaktak sa serbisyo kay migamit og “impounded/recovered vehicle.”

Buyno kamo’ng uban diha nga padayon pa’ng migamit og mga impounded vehicles, kanus-a pa kamo maleksyon?