EDITORYAL - Daghang martyr nga Koreano itandi sa mga Filipino

Niadtong 1521, nadiskubrehan sa mga Espanyol ang Pilipinas ug sa paglabay sa mga katuigan , pinaagi sa Krus ug Espada, kinabag-an sa populasyon niini nahimong mga Kristiyano ang mga Filipino. Ang Pilipinas maoy giisip nga 'Cradle of Christianity' tungod kay gikan dinhi nanukad ang uban pang mga misyonerong Kristiyano nga adunay mga misyon sa Pasipiko, East Asia, Oriental Asia (Formosa, China, Japan, Korean Peninsula).

Daghan ang nangutana kun nganong daghan mang Koreano ang gi-beatify si Pope Francis.  Sa miaging semana, 124 ka Korean martyrs ang mamahimo na unyang santos sa umaabot nga panahon.

Sa naghinapos nga bahin sa 1700 nakasulod ang Kristiyanismo sa Korea, apan sukwahi sa Pilipinas, duna nay kaugalingong gobiyerno ug doktrina ang Kogoryo (karaang pangalan sa Korea) ug gidili nila ang Kristiyanismo.

Gibanabanang kapin diyes mil ka Koreano ang gipatay tungod sa ilang pagka-kristiyano. Mas modaghan pa kini kun madokumento ang mga Kristiyanong gipamatay ubos sa pamunoan sa pamilyang Kim, ang nagtukod sa komunistang North Korea.

Daghang mga Kristiyano ang na-trap  sa North Korea human sa Korean War kay ang gobiyerno nagdili sa relihiyon, gusto sa gobiyerno nga way laing hunahunaon ang mga Koreans gawas lang sa ilang mga lider gikan sa apohan nga si Kim Sung Il, anak niini nga si Kim Jong Il, ug karon Kim Jung Un.

 Base sa mga nanggawas nga reports gikan sa mga "North Korean defectors" liboan kondili man kapin pa usa ka milyon ka mga Kristiyanong Koreans ang naa karon sa concentration camps nga padayong sekretong nagsimba bisan sa hulga sa firing squad.