Ang matakboyan sa leukemia

Ang kanser sa dugong puti o leukemia, matud pa sa mga eksperto ning klaseha sa kanser, sa pagkakaron, malisud pa ang pagtino o pagtumbok sa tinuoray nga mga hinungdan, nga kita masakit niini. Ang mga ahensya o mga foundations nga nag-ugmad para matun-an kini, adunay nahimong konklusyon o pangagpas, nga malagmit ang mga mosunod maoy usa sa hinungdan niini.

      (1)Permi na-ekspos sa mga gamit sa pagtambal o pagkontrol sa ubang klase sa kanser, pinaagi sa sige og pagparadiyesyon.

      (2) Permi nakapanimaho o nakahanggap sa mga kemikals o gas sama sa benzene nga anaa sa unleaded nga gasoline ug ubang ‘hydrocarbons’.

      (3) Sa mga adunay apan o ‘genetic abnormalities’.

      (4) Sa paghanggap og aso o pagpanabako o panigarilyo ug ubang paagi sa pagtabako, sama sa ‘e-smoking’ nga bag-ong istilo karon  sa pagpanabako.

Gituohan usab nga kining sakita sa kanser, wala’y kalabutan ang pagkakaliwat niini. Kay sagad sa mga pamilya sa pasyente, wala may mga record nga sila adunay mga sakit sa leukemia. Adunay leukemia nga mokalit lang nga motakboy mao ang ginganlan og acute leukemia. Anaa say dili dayon mamatikdan nga nag-anam na diay ka grabe  ang pamati sa lawas, nga mao usab ang chronic leukemia.

Unya dugang pangagpas, nga may posibilidad nga daling matakboyan sa leukemia kadtong hilabihan kaputi ang pamanit. Ang sa mga itom, tabunon o morena og pamanit, talagsa ra ug sila dili dali takboyan sa kanser nga leukemia.