Bakasi sa Cordova

Ang pamilya sa mga nangamatay sa pagkalunod sa MV St. Thomas Aquinas human magkabangga sa de kargang MV Sulpicio Express Siete dugay ra nga nawad-an og paglaum nga makadawat og “compensation” nunot sa maong trahedya nga nahitabo sa Lawis Ledge tangkod usa ka tuig ang nakalabay.

Usa sa mga anak sa pasaherong naapil og kalunod nagkanayon nga human sila mabayri sa P66 mil nga financial assistance gikan sa 2GO, igo ra kining gigasto sa pagpalubong sa ilang amahan.  Kasagaran sa gibungat sa ilang baba: Kon mogukod sila sa kompaniya gastoso na kaayo. Ug kasagaran sa mga nangamatay sa maong trahedya mga pordoy nga walay ikagasto kon modangop pa sa korte pun-an pa sa kamatuoran nga ang hustisya sa atong nasud mapalit sa mga adunahan ug langay pa kaayo.

Ang mabasol niini mao ang atong gobiyerno. Kulang kaayo ang atong gobiyerno og ahensiya nga moseguro sa katungod sa mga pasahero nga kon adunay trahedya sa kadalanan o kadagatan, kini unta ang mogukod sa mga common carriers sama sa barkong de pasaheroan, bus, taxi o uban pa. Ang Maritime Industry Authority ug Philippine Coast Guard dili na masaligan kay mas suod sila sa mga operator sa mga common carriers kay sa mga pasahero nga dili gani nila kaila.

Ang mga opisyal ug mga mananagat sa lungsod sa Cordova wala hinuon magpaulahi. Gikiha gyud nila ang 2GO Group Inc. ug ang Philippine Span Asia Carrier Corp. tungod sa matud pa aquatic pollution, clean-up, rehabilitation, ug restoration sa mga mangroves nga giingong nangadaot mugna sa oil spill nga miabot hangtod sa Cordova human malunod ang MV St. Thomas Aquinas.

Ang mga barangay sa Cordova nga naabtan sa oil spill mao ang Day-as Bangbang, Buagsong, ug Catarman.

Apan ning bag-o lang, ang mga mananagat sa maong lungsod lipay na man kaayo nga nakabalik na ang ilang naandan nga negosyo: ang bakasi.

Sumala pa sa balita sa Manila Standard Today nga akong nabasahan, usa ka Joshua Baguio nagkanayon nga nauli na sa naandang pagkinabuhi ang kabaybayonan sa Cordova tungod sa tabang sa 2GO. Gikalipay usab ni Baguio ang financial assistance, bugas ug de lata gikan sa 2GO nga nakatabang nila sulod sa upat ka bulan nga naapektahan sa oil spill ang baybayon nga kakuhaan nila og bakasi.

Usa ka Wilson Dacullo miingon nga nakatabang og dako ang pagpadala sa kompaniya og 30 ka trabahante kada adlaw sulod sa lima ka bulan aron paglimpyo sa mga krudo nga misagol sa dagat.

Si Lito Salvio, 2GO assistant vice president for shipping management, nagkanayon nga ang kompaniya migasto og P55 milyones paglimpyo lang sa oil spill. Dako-dako na gyud diay ang nagasto.