Bombero nananom
Isip kabahin sa pagsaulog sa 23rd anniversary sa Bureau of Fire Protection (BFP) karong tuiga, ang kabomberohan dinhi sa Sugbo mohimo na usab og kalihukan nga pagpananom og mga kahoy.
Gihimo na lang nga naandan na nga kalihokan sa atong kabomberohan ang pagpahigayon og "Tree Planting" activity. Sa miagi’ng tuig nakatanom kami og dili mominos 500 ka similya sa mahogany.
Karong tuiga, buot namo nga mas daghan pa ang among matanom nga similya sa mahogany tree adto sa yuta sa gobiyerno sa Barangay Polog, Consolacion karong Agosto 20.
Mao kini ang among tampo pagsulbad sa problema sa nagkaopaw na nga kabukiran sa Sugbo. Sa ato pa, dili lang ang pagresponde sa sunog ug pag-rescue ang kalihokan sa atong kabomberohan apan lakip na usab ang pagpanalipod ug pag-amuma sa kinaiyahan.
Akong gi-congratulate ang 41 ka bag-ong sakop sa Bureau of Fire Protection (Region 7) ang Batch Mandalusa nga motapos na sa ilang orientation course unya sa Miyerkules.
Andam na kini sila ipang-destino sa nagkalain-laing fire stations sa Central Visayas.
* * *
Sa milabay’ng semana, nahimo nga dako’ng isyu ug nakamugna og kontrobersiya ang pagpaputol sa mga century-old acacia trees nga anaa daplin sa karsada sa habagatang bahin sa probinsya sa Sugbo.
Ang mga apektadong lugar mao ang mga dakbayan sa Naga ug Carcar ug ang lungsod sa San Fernando diin ang mga lokal nga opisyal sa maong mga dapit misuporta sa lakang sa Department of Public Works and Highways (DPWH) nga kini pamutlon.
Risgo na kaayo ang mao nga mga kahoy kay ang uban niini dali na lang matumba kay mga lungagan na ang dapit sa subok ug ang ubang mga kahoy makasabal sa pagpalapad sa karsada.
Gihunong una ang pagpamutol tungod sa kamandoan sa Department of Environment and Natural Resources (DENR). Daghan ang misupak sa pagpamutol sa mga century old trees labi na g’yud kadto’ng mga environmentalist. Apan daghan usab ang miuyon sa pagputol sa mga kahoy ilabi na ngadto sa direkta’ng maapektohan unya kun mahitabo nga ang mga kahoy mahagsa.
- Latest
