Itudlo hain si Ecleo
Daghan ang nagtuo nga nakalimtan na sa mga polis ang pagpangita kang Ruben Ecleo, usa sa lima ka labing idlas nga dakponon sa mga otoridad sa Pilipinas kansang ulo may patong nga ‘tag P2 milyones.
Usa sa mga kauban ni Ecleo nga “wanted” usab apan nadakpan na mao si retired general Jovito Palparan, busa upat na lang karon ang may patong nga tag P2 milyones, ug wala pa kita masayod kinsay nakadawat sa premyo sa pagkasikop ni Palparan.
Si Ecleo pirme man diay (kuno) dinhi sa lalawigan sa Cebu nga nagpahayahay sa kaugalingon sa nindot kaayo’ng mga dagat-kaligoanan.
Gani matud pa usa sa mga lugar nga kanunay nga gisuroyan ni Ecleo mao ang Talisay City.
Kini ra ba si Mayor JVR sa Talisay City taga Mindanao usab ang kaliwat busa, daghang nagduda nga basin kaila kini’g si Ecleo.
Wala usa’y nasayod kun may contact ba si Mayor JVR kang Ecleo. Ngano’ng mosuroy-suroy man kini sa Talisay.
Si Ecleo konbiktado sa kaso’ng pangawkaw sa kuwarta sa gobiyerno nga iyang giwaldas diha nga mayor pa siya sa lungsod sa San Jose didto sa Dinagat Island, diin nahimo usab siya nga kongresista.
Konbiktado usab si Ecleo sa kaso’ng parricide kabahin sa pagpatay sa iyang asawa nga si Alona kaniadto’ng 2002.
Karon nasayran sa Espada nga gipangita pa diay siya sa mga otoridad ug wala diay makalimti, busa angay kini’ng bantayan sa taga Talisay, aron inyong maangkon ang P2 milyones nga patong sa iyang ulo. ([email protected])
- Latest
