Kaduha ra mokaon

Suma pa ning balita diri, daghang Pinoys ang mokaon og duha ra ka higayon kada adlaw. Kini tungod sa kamahal sa pagkaon. Kuwang ra ang suweldo kun katulo mokaon matag adlaw.

* * *

Duna kita’y nahibaw-ang mga tawo nga kaduha ra sad mokaon kada-adlaw bisan ang suweldo naghinobra. Kasagaran nila moinom ra’g coffee unya maghanapbuhay na. Usahay malimut pa gani sa paniudto, deretso na lang sa panihapon.

* * *

Kining  mga tawhana nagtrabaho og opisina diin dunay oras nga gitakdang tumanon ug dunay personal nga negosyo diin duna say oras nga angay’ng tumanon. Dagko kini sila’g kita matag buwan apan usahay mo-snack na lang imbes kompletong paniudto.

* * *

Apan naa say dili mamahaw, gatas ray imnon, ug way pupaniudto ug gamay ra ang kaunon sa panihapon. Kini sila mao kadtong nagbantay sa pigura sa ilang lawas. Mahadlok manambok kay makaapektar kini sa ilang propesyon.

* * *

May rason kadtong   kaigsuonan nato nga suma sa balita duha ra ka higayon makakaon sa usa ka adlaw. Kini tungod sa kamahal tuod sa palaliton lakip na ang pagkaon. Mao kini sila ang angay’ng hatagan og pagtagad sa kagamhanan. Ug sa atong katilingban.

* * *

Atong nabasahan nga didto sa Switzerland ang Swiss community moabag sa kagamhanan sa pagtabang sa mga kabus nga sakop sa komunidad. Wa man idetalye sa balita ang paagi sa pagtabang sa komunidad.

* * *

SA LAING BAHIN ... Greetings diha sa atong mga higala sa Talisay ug Minglanilla public markets kinsa way hunong ang pagsuporta ning Banat News. Daghang salamat