Maayo’ng lakang sa Lapu-Lapu

Sa dili pa ang tanan, ako nga gipahibalo ang amo nga   kaparyentehan sa Kabisayaan ug Mindanao sa kamatayon sa akong inahan, si Mama Lagrimas Pagalan Malicay, didto sa Tambulig, Zamboanga del Sur.

Mipanaw si mama kaniadtong Domingo sa kaadlawon sa pangidaron nga 80 anyos. Ug nadesisyonan sa among pamilya nga sa Domingo, Agosto 3, ang iyang lubong didto usab sa sementeryo sa among lungsod.

Wala gayud kami magdahum nga dinhi ra kutob ang iyang kinabuhi ug kuhaon na sa kahitas-an ang among inahan. Baskog pa kini sa dihang mibakasyon pa kami didto sa Zamboanga del Sur sa nakalabay nga Mayo.

Apan dili gayud diay nato matag-an ang panahon. Wala gayud kita mahibalo kun kanus-a ang atong katapusan.

* * *

Sa tinguha nga mas maila pa ang dakbayan sa Lapu-Lapu isip sentro sa industriya sa turismo sa Pilipinas, usa ka ambisyoso nga branding ang gilusad sa kagamhanan sa siyudad sa niagi nga semana.

Apan dili lamang kini nagtumong pagpalambo sa turismo sa maong dakbayan. Ang slogan nga “Historic Resort City” gitumong usab pagdani og mga dugang mamumuhonan ug mga individual talents.

Usa ako sa nakadayeg niini’ng maong kampanya sa mga opisyal sa maong siyudad. Kini tungod kay nagpasabot kini nga dili lamang diay turismo ang kaya niini nga ikabuga. Aduna pay dagha’ng potensiyal ang mao’ng dakbayan.

Ilalum niini’ng mao nga branding, mas pakusgan pa sa kagamhanan sa Lapu-Lapu City ang paghakot og dugang mga investors. Ug kini dili lamang mga mamumuhonan sa industriya sa turismo.

Hinuon, dako kaayo nga advantage sa Lapu-Lapu City ang pagdani og mga negosyante. Accessible kini tungod sa Mactan Cebu International Airport nga anaa mismo sa maong siyudad.

Kini gawas pa sa maayo nga infrastructure niini.

Ug sa ako’ng tan-aw adunay dako nga tsansa nga molampos kini’ng mao’ng kampanya. Kini tungod kay hagbay ra nga attractive ang mao’ng dakbayan sa mga mamumuhonan.

Gani, anaa diha nahimutang ang Mactan Export  Processing Zone, ang usa sa labi’ng dako nga processing zone sa Pilipinas.