Krisis sa liderato

Ang nabahin nga baruganan sa mga Pilipino ning kontrobersiyal nga “executive pork barrel” pinaagi sa Disbursement Acceleration Program maisip nga dakong bul-og nga mobanwas sa kasuko sa mga tawo batok sa korupsiyon sa gobyerno. Sugod sa Ubos Balay Balaoranan, makita atol sa State of the Nation Address ni Pres. Noynoy Aquino ang suporta sa kinabag-ang mga senador ug kongresista ngadto sa administrasyon.

Walay bisan gamay nga epekto nga nahimo ang walk-out sa mga walhong magbabalaod.

Ang nakanindot kay ang pulso sa mga tawo tua makatutok sa Korte Suprema diin ang mga mahistrado, mga kawani ug ubang sakop sa Hudikatura, nanagsul-ob og sapot nga nagpakita sa ilang protesta batok sa kawalay respeto ni Noynoy sa atbang ug katupong nga sanga sa estado.

Apan mag-unsa man ang pulso sa mga tawo kun ang ilang mga representante sa Ubos Balay Balaoranan ug Senado kanunay nag-aleluya ni Noynoy?

Ubos unta sa prinsipyo sa Demokrasya ug Republikanismo nga mao untay prinsipyo nga gisunod natong mga Pilipino sa atong pangagamhanan sa Pilipinas, ang mga magbabalaod giisip unta nga representante sa mga tawo nga maoy nagluklok kanila diha sa gahum. Apan wala masunod kining maong prinsipyo, kay ang mga magbabalaod modesisyon lamang sa ilang gusto bisan wala magsubay sa kagustohan sa mga tawo nga nagpili kanila.

Kining Priority Development Assistance Fund sa mga magbabalaod ug ang DAP sa Malacanang igo na kaayong nakapa-ulbo sa kasuko sa mga tawo. Giisip kini nga dautan nga kinahanglan na untang mahunong. Pun-an pa sa interpretasyon sa Korte Suprema nga pulos unconstitutional ang PDAF ug DAP.

Apan human sa ika-upat nga SONA ni Noynoy nasukod sa mga tawo unsa kahinangop ang mga magbabalaod sa pagsupak ug kagustohan nga mawagtang na kining duha ka dautan sa gobyerno.

Ubos kaayo ang ilang kahinangop, nga sa mga barbero pa, nagpakita sa ilang kahiubos tungod kay natangtangan sila og tinubdan sa korupsiyon – tinubdan nga nakapaburot sa bulsa sa mga politiko.

Lisod ipamugos ning panahona ang pagwagtang ning maong mga dautan sa gobyerno, ilabi na nga ang Malacanang ug Kongreso andam mosungag sa Korte Suprema pinaagi sa pag-apeke sa Judicial Development Fund.

Ikalipay sa mga tawo kun ma-utingkay ang pundo sa Hudikatura nga sa dugay’ng panahon natabonan sa gitawag og “fiscal autonomy” nga gihatag sa Konstitusyon.

Apan kun gamiton kini sa Malacanang ug Kongreso pagpabuhi sa na-apeke nga PDAF ug DAP, angay na kining kahadlokan sa mga yanong Pilipino, tungod kay senyales na kini sa pagkahanaw sa respeto sa usa ka branch ngadto sa laing branch.

Krisis kini sa atong gobyerno nga ginama lamang sa mga opisyal nga wala magsunod sa pulso sa kinabag-ang Pilipino.