Wala g’yud mamakak si Kap

Gidayeg namo ni Vice Mayor Edgardo Labella si Ermita Barangay Kapitan Felicisimo “Imok” Rupinta kay wala siya maglipud-lipod pag-angkon nga daghan pa kaayo nga mga video karera ug moli-moli nga nag-operate diha sa iyang barangay.

Gani giawhag pa ni Kapitan Imok ang kapolisan nga hutdon pagpangsakmit ang mao nga mga video karera nga pwerte pa’ng daghana diha sa iyang barangay, ilabi na sa Sitio Ermita Proper dapit sa dagat, sa Sitio Bato ug Sitio Baho.

Kini’ng Sitio Baho ug Sitio Bato mao kini ang lugar nga likud ra g’yud tawon sa Carbon Police Station, sa mga bata pa “maabot ra gani og imong lud-an” apan wala makaronda ang kapolisan. Ngano kaha?

Motuo ko ni Kapitan Imok nga pwerte pa’ng daghana nga video karera diha sa iyang barangay kay siya gud ang giila nga amahan diha sa Ermita. Ang pag-angkon ni Kapitan Imok nagkonpirmar kini sa mga report nga akong nadawat.

Si Vice Mayor Labella miingon nga angay g’yud nga aksyonan dayon sa mga polis ang report ni Rupinta. Angay tingali nga hulipan ni Senior Superintendent Noli Romana ang mga hepe niya sa kapolisan nga wala lang magtagad sa mao nga problema. Maghuwat pa ba diay mo’g reklamo?

Gidayeg nako si Kapitan Imok kay dili siya sama sa laing kapitan nga akong nahinabi nga pwerte’ng nakapamakak. Wala g’yud kuno’y mga video karera sa iyang barangay kay kun duna pa, siya g’yud ang mangunay sa pagsakmit.

* * *

Sa laing bahin, atensyon Superintendent Romeo Santander Sir… ang report nako nga nadawat misiaw na g’yud pag-ayo ang pagpamaligya og shabu diha sa Barangay Pulangbato.

Dunay mga ngalan nga gisumiter kanato apan dili lang nako ipublikar dinhi. Itugyan na lang nato sa kapolisan pinaagi nila ni Romana ug Santander ang pag-aksyon sa mao nga mga report.

Hinuon, saludo ko sa mga sakop sa kapolisan dinhi sa dakbayan kay daghan sila og kalampusan sa kampanya batok sa gidili’ng matang sa drugas.

Lupig pa nila ang mga sakop sa Philippine Drug Enforcement Agency (PDEA) nga kun dili hatagan og inpormasyon sa ilang mga kauban sa laing lugar dili makaangkon og dako’ng kalampusan.

Kadto’ng nakakuha sila og usa ka kilo nga shabu nga gisulod sa ilawom sa sapatos, inpormasyon kadto sa mga sakop sa PDEA didto sa Muntinlupa nga gihatag lang kanila.