Wala g’yud ko masayop

Tan-awa, sa gihimo nga saturation drive sa atong kapolisan nga gipangulohan ni Senior Superintendent Noli Romana ug Superintendent Romeo Santander, 38 ka video karera ug moli-moli gambling machines ang ilang nasakmit sa lainlaing dapit dinhi sa dakbayan.

Nagmatuod kini nga grabe na kaayo ang pagkuyanap sa mao nga ilegal nga sugalan dinhi sa dakbayan sa Sugbo nga gipasagdan ra sa atong kapolisan nga nadistino sa lainlaing mga police stations.

Kun tinuod man nga wala masayod niini si Sir Romana nga mikatap na diay ang video karera ug moli-moli dinhi sa dakbayan, gilimdan ra diay siya sa iyang mga hepe? Tsk. Tsk. Tsk.

Dili malilong kay daghan man ang mo-report nato. Dili na lang nato ipublikar ang mga report nga akong madawat kay makabantay unya, ideritso na lang nato kang Sir Romana.

Daku gihapon hinuon og pagsalig si Sir Romana sa iyang mga sakop nga motrabaho lang gihapon aron pagsumpo sa mga ilegal.

* * *

Husto  g’yud kaayo ang gisulti ni Atty. Levito Baligod nga gikinahanglan ang pagpakabana sa katawhan aron hingpit nga masumpo ang mga binuang sa atong mga opisyal sa kagamhanan.

Si Baligod maoy kanhi abogado sa mga whistleblowers sa pork barrel scam ug kauban siya ni Court of Appeals Executive Justice Gabriel Ingles nga speakers sa forum nga gihimo didto sa University of San Carlos (USC) Talamban campus.

Mao ‘sab si Ingles, midasig sa katawhan pinaagi sa pag-ingon “Active citizenry is vital since it demands accountability and transparency that will promote integrity in public office.” Sayonan ka nga moabot og usa ka Bilyon ka pesos ang mga pork barrel sa mga senador, ug posible pa nga adunay pipila ka kongresista nga apil usab nga nagbinuang sa ilang barrel.

Anugon kaayo ang mao nga kuwarta nga nabulsa lang sa mga mapahimuslanon kay kun gigasto pa kini sa proyekto daghan na nga mga kabus ang nakabenepisyo.

Ang nakadaot lang kay adunay mga tawo nga mahadlokon pagbutyag sa kamatuoran kay mahadlok sila. Dinhi nga bahina angay nga daygon si Atty. Baligod kay bisan og risgo ang iyang gihimo nga mahimo’ng private complainant batok sa pork barrel scam, apan wala siya mahadlok ug misaad nga ipadayon ang iyang krusada.

Alang nako, angay siya nga sundon sa katawhan.