Nabalaka ka ba?

Kinsay magtuo nga ang usa ka eroplano nga adunay sakay nga halos 300 ka pasahero kalit lang mabungkag sa kawanangan human maigo sa gitawag nga ground to air missile.

Kinsay magtuo nga ang mga plano ug ang mabungahon nga kinabuhi sa mga sakay sa maong abyon sa kalit lang mapapas human kini mabungkag sa bomba.  Kinsay magtuo nga pulos inosente’ng tawo ang nabiktima tungod sa nagpadayong kasungian tali sa Pro-Russian Separatists ug sa gobiyerno sa Ukraine?

Ug ang mas nakapaet pa, kontrolado sa mga rebelde ang dapit diin napunta ang mga tipaka sa nahagsa nga abyon ug ang nagkabuwag-buwag na nga parte sa lawas sa mga pasahero.

Karon sentro sa imbestigasyon ang Russia nga adunay kapasidad sa pagtira og bomba ug nahatagan og gibug-aton ang maong pagduda dihang nitumaw ang mga hulagway nga adunay mga bomba nga gihatod sa maong dapit sa Ukraine pipila ka oras sa wa’ pa mahitabo ang pagpa-ulbo sa Malaysian Airlines flight MH-17.

Karon, daghang pangutana ang angay nga tubagon. Kinsa ang responsable sa pagpamomba?  Kinsay angay nga silotan sa maong insidente o kung aduna bay masilotan sa maong trahedya?

Tubagon ba sa Russia ang mas nisibaw nga pagduda nga gikan nila ang maong bomba?  Unsay silot kun masilotan man, ang ipahamtang sa maong nasud?

* * *

Nakugang ang kalibutan sa maong sitwasyon.  Apan unsa bay gihimo aron unta maluwas ang mga inosente gikan sa nagka-grabe’ng away tungod sa pag-inilogay sa teritoryo.  Pila pa kaha ka inosente’ng kinabuhi ang makalas tungod sa away nga dugay nang wa’ pa mahilot.

Kining mga butang nga nitumaw karon, makabalaka pa ba sa katawhan? Nakugang kita sa makadiyot dihang nahibaw-an nato ang dako’ng trahedya nga nitumaw dihang gipa-ulbo ang usa ka abyon.  Apan human sa pipila ka adlaw, normal ang tanan ug hinay-hinay na nga nakalimtan.

Kontento na lang ba kita nga magpaabot sa mga bagyo, sa mga panghitabo sama sa kasungian sa mga nasud ug ang pagpamomba sa eroplanong gisakyan sa mga inosenteng pasahero?

Ang mas nakapahadlok kay basin moabot na ang panahon nga makubalan na ‘ta sa mga panghitabo sa atong palibot ug igo na lang kita sa pagdawat sa mga insidente nga wala na ‘tay himuon pagkahuman.