EDITORYAL - Ang pag-drive di katungod

Kun ang mga drayber madakpan sa mga road law enforcers, ila ra usab kini nga tinuyoan kay wala man sila magmatngon sa pagmaneho sa ilang sakyanan.

Ang mga buotan nga drayber nga motuman lang gayud sa balaod sa tukma nga pagmaneho og sakyanan, dili gayud madakpan. Kusog kaayo nga moreklamo ang mga drayber kun sila dakpon na sa mga traffic enforcers ug sa mga sakop sa Land Transportation Office.

Apan tinuyoan nila ang paghimo og salaod. Daghang mga drayber nga bisan ang pagsul-ob sa gilatid nga uniporme kun mag-drive sila og passenger bus, jeepney, taxi, truck ug mga van-for-hires dili motuman.

Duna pa gani mga drayber nga mo-extra pag-drive og sakyanan sa ilang amigo nga dili maantigo mopasiga sa headlight sa sakyanan panahon sa gabii mao nga magdagan ang sakyanan nga wala magsiga ang suga.

Ang pagmaneho og sakyanan dili gayud katungod sa usa ka tawo nga gilatid diha sa Konstitusyon kondili pribileheyo ra kini nga gihatag sa kagamhanan ug mao kini ang rason nga adunay katungod ang kagamhanan sa pagkontrolar sa mga drayber.

Ang mga drayber nga badlongon angay gayod nga tangtangan sa lisensya ug dili na tugotan nga maka-drive. Angay’ng ipatuman na ang lagda sa Transportation and Traffic Code nga kun ang drayber makasala og katulo sa usa ka tuig, suspensohon ang iyang lisensya sa termino nga molanat og duha ka tuig.

Siyaro og dili motagam, apan ang LTO wala kaayo mopatuman niining balaora.