Pag-ampo

Lain na sad nga ayroplano sa Malaysian Airlines ang nadisgrasya. Tanang pasahero -- 298 suma sa listahan nga na-released -- ang giingong nangamatay. Didto kini nahitabo sa Ukraine.

* * *

Wala pa gani masulbad ang misteryosong pagkawa sa unang Malaysian Airlines plane, ania na sad ni. Hapit tanang kagamhanan sa nagkadaiyang kanasuran, mibutyag sa ilang pahasubo.

* * *

Si Mrs. Natividad “Naty” Cuerpo, usa ka poultry products trader nga taga Davao apan ania na dinhi magpuyo sa Sugbo, sa iyang pagkadungog sa balita, kalit nga nanguros ug misulti’g pipila ka pulong sa pag-ampo sa iyang hunahuna.

* * *

Si Naty magbiyahian ngadto sa Manila kalabot sa iyang negosyo ug kanunay nga ayroplano ang luwanan. Matud niya “before and after” siya mosakay og ayroplano mohapit gayud siya sa Basilica del Sto. Niño aron sa pag-ampo nga hinaut pa nga magmaayo ang iyang biyahe ug sa iyang pagbalik sa Sugbo adto gayud siya unang moderetso sa maong Basilica aron magpasalamat.

* * *

Kapin na sa lima ka tuig nga iyang gisunod kining iyang pagsalig sa iyang kinabuhi sa Señor basta mogawas lang siya sa Sugbo bisan asa siya mahapunta kalabot sa iyang panginabuhi.

* * *

“So far wa pa gyud ko pakyasa ni Senyor Sto. Niño. Kanunay nga luwason ang akong pagbiyahe bisan asang suok sa nasud,” matud ni Naty kinsa usa baya ka convert gikan sa laing relihiyon.

* * *

SA LAING BAHIN ... Miuban kita sa libuan ka mga bumabasa sa The Freeman sa pagtunol sa atong pahalipay sa maong igsoon ning Banat News atol sa 95th anniversary sa maong mantalaan.