Video karera ug shabu

Hatagan nako og pagtagad ang daghan na kaayo nga inpormasyon nga gipadangat kanako gikan sa mga magbabasa sa Banat News. Sari-sari ang reklamo, ilegal nga sugal, drugas ug uban pa.

Didto sa Barangay Pit-os, adunay duha ka drug pusher nga nadakpan sa mga polis apan matud pa gipangbuhian man! Una, ang usa ka Dodot nadakpan sa giingong kalambigitan sa drugas apan pagka ugma nabuhian man.

Ang usa igsuon og kapitan sa barangay nga sakop sa “Group of Eight” duol sa Talamban, matud pa nalambigit ‘sab sa kalihukan sa ilegal nga drugas apan wala g’yud aksyoni sa mga polis.

Ang akong inpormer miingon nga wala na g’yud sila’y salig sa kapolisan diha sa Talamban. Ambot tinuod ba nga dunay polis nga mokuha og sud-an sa karenderiya ilista ra unya ang mobayad si Dodot. Grabe!

* * *

Unya, ari ta sa ilegal nga sugal. May mipahibalo nako nga adunay balay diha duol ug kilid sa koral sa Inayawan Sanitary Landfill nga ila ni Ekoy, awhagon nako si Senior Supt. Noli Romana nga ipasusi ni. Ipasusi lang sir kay ang akong inpormer nagkanayon nga dunay tulo ka video karera nga gi-operate sa balay ni Ekoy. Ang uban nga video karera diha sa Inayawan giingon nga bag-ong “laya” sa city jail nga ang angga Kiko maoy nagunit.

Unya luyo nga bahin sa Blessed Sacrament Church sakop sa Barangay Tejero, adunay balay nga iya sa usa ka Arsenia. Palihog ko Sir Noli Romana (Cebu City Police director) ipasusi ang balay niining Arsenia kay ang akong inpormer miingon g’yud nga adunay video karera ug moli-moli nga gi-operate. Walay kumo sa pakisusi.

Sagdi lang, nagsabot na kami si Sir Noli Romana nga paaksyonan dayon niya ang atong report sama sa gihimo niya sa miagi’ng semana.

* * *

Adunay mireklamo nako nga pipila sa mga PUJ sa Minglanilla dili molahos sa ilang destinasyon kun gabii na. Sayon ra kaayo na uy. Ilista ang plate number, oras, ug rota sa PUJ, unya ireklamo sa LTO. Tudloi og leksyon ang drayber pinaagi sa pagpamulta og gamay lang – P5 mil.

* * *

Ang inyong mga report nga gusto’ng paaksyonan sa kapolisan, i-text lang sa 0933-570-0853.