Fight g’yud ta Sir Noli

Gipabilib g’yud ko ni Cebu City Police Office (CCPO) director Noli Romana kay gipaaksyonan dayon niya ang report nga gihatag sa informer nato diha sa Barangay Pahina-San Nicolas nga adunay duha ka video karera nga gi-operate.

Dili lang kay duha ka video karera ang ilang gisakmit, aduna pa’y laing duha ka moli-moli. Naa ra man diay na. Makapangutana ko sa kapolisan sa Station 6 nga nagbase sa Barangay Sawang Calero kun ngano nga molihok ra man sila og sugoon sa ilang hepe.

Angay g’yud nga si Senior Superintendent Romana mohatag og kamandoan sa iyang mga sakop sa lainlaing stations nga mohimo’g “all-out war” kay anam-anam na g’yud nga mikaylap pagbalik ang video karera, moli-moli, masiao ug mga hantak ug tigbakay.

Ang inpormer nako diha sa Barangay Pahina-San Nicolas mitaho nga halos ka tulo sa usa ka semana magtigbakay diha sa ilang lugar ug walay modakop kay konsehal sa barangay ang nagpasiugda.

Kun tinuod man gani kini, pastilan ka dakong uwaw nga ang kapitan nga si Antonio Caruzca wala magtagad. Capt Ton, ngano’ng gipasagdan ra man nimo ang mga ilegal nga kalihukan sa imong barangay.

Motuo man g’yud ko kay kredible kaayo ang akong source diha nga anaa ra sa barangay. Gani, samtang nagsuwat ko niini’ng lindog, mi-text na usab ang akong inpormer nga mobutang kuno’g balik og video karera ug moli-moli sa balay ni Cynthia.

Kun mobutang pagbalik og sugalan kadto’ng tag-iya sa gisakmit nga video karera unya dili mohimo’g aksyon ang mga polis sa Station 6, magduda na ta. Angay na tingali nga molihok na si Senior Superintendent Romana ani. Sa wala pa mogikan si Mayor Rama paingon sa Estados Unidos kaniadto’ng Huwebes, nagbilin siya og awhag sa kapolisan nga paspasan ang kampanya sa ilegal nga sugal ug drugas.

Kun aduna kamo’y gusto nga i-report, text sa 0933-570-0853. Ayaw lang pagtawag, text lang sa inyo’ng mga report.

* * *

Saludo ko niadto’ng mga polis nga nanglimpyo sa Guadalupe River kaniadto’ng miaging Martes sa buntag. Ang mga molupyo nga nagpuyo daplin sa sapa angay’ng mauwaw sa paglabay nila’g mga sagbot sa sapa. Undanga na ninyo ang inyo’ng gihimo.

Awhag nako sa kapolisan nga kanunayon ninyo ang pagpanglimpyo ug pagtabang sa pagpreserbar sa atong kalikupan.