Fr. Obach, nakalimot nga pari

Ang simbahan dalangpanan sa mga masakito’g kalag. Ang pari maoy gitugyanan sa Ginoo nga mananambal sa himalatyong kalag.

Usa ka menor de edad nga inahan apan dili asawa, nagkugos sa bunga sa iyang pagkamakasasala atubangan ni Padre Romeo Obach aron kini pabunyagan. Kay isip Kristiyanos diha man sa Sakramento sa Bunyag nga kitang mga kaliwat sa salang panulondon mahugasan sa kahugaw aron maangkon nato ang kahigayonan sa kaluwasan.

Ang pagduol sa single parent ngadto sa pari nagtimaan nga giangkon na niini ang dakong sala nga iyang nabuhat. Apil na niini kadtong pagsulay niya’g hikog dihang gibiyaan siya sa iyang uyab human siya pamabdosi. Tuyo sa maong batan-ong Mama nga matambalan ang iyang pagkahisalaag pinaagi sa bendisyon sa pari. Apan subo kaayong palandungon nga imbes sagakayon siya sa iyang pagkahisukamod, gitiwasan hinuon siya’g yatakyatak sa pari ginamit ang mga hugaw’ng pulong nga dili makaon sa iro atubangan sa 50 ka mga dinapit sa maong bunyag.

Segun sa akong pagsabot, maoy tumong sa pari ang pagpahimangno sa tanang nanambong nga ang gibuhat sa single parent usa ka dakong kalapasan sa kabubut-on sa Ginoo. Busa, di maayong sundon. Naatol lang nga niadtong aktoha, maoy mipasulabi sa galamhan sa pari, ang tawhanong kasuko ug nalimtan niya ang kaputi sa sotana nga iyang gisul-ob. Ang tawhanong kasuko iyaha sa yawa. Busa, abtik ang mga demonyo nga misakay sa kapungot nga maoy nakapahuyang sa espirituhanong aspeto ni Fr. Obach niadtong tungora. Resulta, mga pulong ug kinaiya ni Satanas ang nanggawas sa iyang mga baba ug dili ang Iyaha sa Ginoo.

Ulahi na kaayong nakamatngon si Fr. Obach nga nadala diay siya sa gahom sa daotan, diin usa ka higayon sa iyang kinabuhi, nakalimot siya nga usa diay siya ka pari — ang doktor sa mga kalag nga masakiton.

Hinuon, wala siya maglangay. Giangkon ni Fr. Obach ang dakong sala nga iyang nabuhat. Ug dihadiha, nangayo siya’g kinasingkasing nga pasaylo sa tanang hingtungdan. Usa ka dalayegong buhat nga gikalipay sa atong Ginoo.