EDITORYAL - 95 ka tuig nga panerbisyo

Karong adlawa magsaulog ang igsuong pamantalaan sa Banat News sa ilang ika-95 ka tuig nga pagserbisyo sa publiko dili lang sa mga Sugboanon kondili lakip na sa mga kasikbit nga lugar sa Central Visayas. 

Sukad nga ang The Freeman gitukod niadtong Hulyo 18, 1919 ni Don Paulino Gullas daghan na kini og mga unos nga giagian hangtod nga nanirado niadto’ng Ikaduha’ng Kalibotanong Gubat ug gi-revived niadtong 1965 ni Sir Jose “Dodong” Gullas, karon maoy Chairman sa The Freeman ug Banat News.

Miagi usab kini sa mata sa dagom atol sa Martial Law hangtod na sa pagbalik sa demokrasya sa nasud niadto’ng 1986 Edsa People Power Revolution.

Apan nagpabiling lig-on tungod sa pasensya ug pagmahal sa pamilya’ng Gullas uban ni Sir Juanito V. Jabat, ang walay paglubad nga Editor-in Chief sa Banat News kaniadto ug karon mao na ang Publisher.

Mas milig-on pa ang The Freeman human masakop sa labing dako nga publishing corporation sa nasud, ang Star Group of Companies pinaagi sa pagdumala ni Sir  Miguel Belmonte.

Sa 95 ka tuig nga panerbisyo publiko sa The Freeman, way si bisan kinsa’ng lumad nga Sugboanon nga wala makaila niini isip labing karaan ug nag-unang pamantalaan sukad pa kaniadto ug hangtod karon.

   Dako nga hagit  alang sa mga kawani sa The Freeman  ang modernong panahon, apan sama sa mga kasinatiang giagian sa mga nag-unang kawani sa pamantalaan kaniadto,  bukas sa kasingkasing nga gidawat sa bag-ong henerasyon ang internet age.

Sa 95 ka tuig nga panerbisyo sa katawhan, wala nay mga pagsuway pa nga dili niini mabuntog. Ang Banat News nalipay sa dako’ng suporta sa mga suki nga tigbasa sa The Freeman kay tungod kaninyo nagpadayon ang legasiya sa gibunyagan nga “Oldest Newspaper of Cebu.”