EDITORYAL - Napagan sa PDAF

Wa pa gihapon mosibog si Presidente Benigno Aquino III sa iyang baruganan sa Disbursement Acceleration Program (DAP) bisan gideklarar na sa Korte Suprema nga kini “unconstitutional.”

Ang presidente mipalanog sa iyang baruganan ug miesplikar kun unsa ang DAP ug kun unsay kalainan niini sa Priority Development Assistance Fund (PDAF) o pork barrel sa mga magbabalaod ug sa paagi sa pagpagawas niini. Butang nga wala tan-awa og maayo sa mga mahistrado.

Ang DAP funds maisip nga “presidential pork barrel” gamiton niya kini sa mga proyekto nga sa iyang tan-aw nagkinahanglan og dinaliang pundo nga kun ipaagi pa sa normal nga proseso malangan ug mausik ang panahon tungod sa kagrabe sa burokrasya sa nasud.

Gigamit kini sa mga soft ug hard projects sama sa edukasyon, health care ug mga inprastraktura, sama lang gihapon sa tumong sa PDAF.

Kini maoy hinungdan nga wala magpanuko ang Korte Suprema sa pagkonsiderar niini nga ilegal tungod usab sa nahauna na nilang pagsuspenso sa pagpagawas sa pork barrel funds sa mga magbabalaod.

Sa laktod pagkaestorya, ang DAP nadala sa kahig tungod sa kontrobersiya sa PDAF. Kahiwian nga maoy gigukod sa pamunoan ni Aquino tungod sa kurapsyon nga nahimo nang kanser sa gobiyerno.

Wala makabantay ang Presidente nga sa pag-abli niya sa lata sa “pork barrel”, mabantang usab siya sa iyang mga kritiko nga gustong makabawos.

Ang dakong hagit niini karon, kung unsaon pagkombinsir ni PNoy ang Korte Suprema sa dakong kalainan sa DAP ug sa PDAF.

Ang Judiciary ug Executive Department adunay separation of powers base sa Konstitusyon, dili mahimong magsapaway ang duha  kay kun mahitabo kini magkagubot gyud ang nasud.