Kun ma-impeach si Noynoy

Natural, lipay g’yud kaayo ug mag-fiesta ang mga kontra ni Presidente Benigno “Noynoy” Aquino kun siya ma-impeach. Ambot kun mag-fiesta ba usab kaha ang tibuok nasud. Apan kini ang lagmit maoy mahitabo. Of course, presidente na si Vice President Jejomar Binay, Acting Vice President si Senador Jinggoy Estrada kay gumikan sa edad ug sa iyang sakit dili na ibalik si Senador Juan Ponce Enrile pagka-Senate President.

Si Senador Bong Revilla o si Senador Nancy Binay maoy pilion pagka-Senate President, si Senador Gringo Honasan mahimo’ng ipuli ni Senador TG Guingona pagka chairman sa Senate Blue Ribbon Committee ug si Senador Bongbong Marcos himoon nga Senate Majority Floor Leader. Bunga lang kini sa mga wild imagination sa akong amigo kun ma-impeach si Noynoy. Ang pakighinabi ni Noynoy sa tibuok nasud kagahapon, natural, wala makakombensir sa opposition ug sa iyang mga kaatbang. Ang mituo kaniya kadto ra’ng daan na nga mituo kaniya.

Sa mga tambay pa “Let us to wait and see. Maklaro ra unya ang scatter.”

* * *

Kataw-anan ning nahitabo sa Bureau of Customs sa kaulohan. Giisip nga dakong milagro gumikan sa pagkahanaw sa binaril nga crude oil, ang uban nga krudo nahimo’ng tubig. Milagro sa tanang milagro, maayo unta to kun ang tubig nahimo’ng krudo, dili unta momahal ang diesel.

Mga binaril kini nga krudo nga nasakmit, gi-stock sa BOC-Port of Clark. Kaniadto’ng Abril sa miaging tuig, nadiskobrehan nga 65 sa 156 ka baril nga diesel fuel, giilisdan og tubig. Sa miaging Hunyo ning tuiga, laing 50 ka baril sa diesel, nahimo na ‘sab nga tubig.

Sa nahibilin nga 41 ka baril, nadiskobrehan ‘sab nga laing 14 ang nahimo’ng tubig ug lain pa g’yud nga unom pa ka barrel ang nahanaw. Karon, sa 156 ka baril nga krudo, 21 na lang ang aduna pay sulod nga diesel.

Ang mas dako’ng milagro niini, mao nga hangtod karon, wala g’yuy nasakpan kun kinsa ang nag-magic nga mahimo’ng tubig ang diesel fuel. Dili baya sayon ang pagsuyop sa diesel ug pag-ilis niini og tubig. Dili ni mahimo sa usa o duha lang ka tawo. Unya, kinsa ug diin man ‘sab kini i-deliver?

Nagpatabang na ang BOC sa kapolisan ug sa NBI aron masakpan ang naghimo sa maong mga milagro. Ang pilferage gihimo sulod sa term sa upat ka nagpuli-puli nga Customs Commissioner. Ngano’ng wala man pabantayi sa mga Customs Police ang bodega? Gituyo ni?

Giingon ‘sab nga dunay 16 ka customs personnel, mga assessor ug examiner sa kaulohan ang nag-atubang og imbestigasyon gumikan sa pagduda nga nalambigit sila sa rice importation ug smuggling.

Pastilan, naunsa man ta niini uy? Mora’g maayo g’yud nga pagkadulot sa atong kaugatan ug kabukogan ang sakit sa corruption. Tan-aw nako, despite sa paningkamot unta ni Noynoy pagsubay sa daan na matuwid, mora’g dili g’yud masanta completely ang corruption sa atong nasud. Tingali this will take 50 more years to completely eradicate it.

Unsaon, mora man og nahimo na kining kabahin sa atong kultura ug way of life. Ambot kanus-a moabot ang panahon nga maka-realize kita nga after all, money is not everything.