EDITORYAL - Sumasakay na ‘sab ang sakripisyohon

Ang mga sumasakay sa public utility vehicles (PUVs) mao gihapon ang sakripisyohon sa mga drayber kun aduna sila’y wala mauyoni sa mga lagda sa kagamhanan imbes nga ang ilang reklamo adto unta nila ipadangat sa mga opisyal nga hingtungdan.

Pabilin nga wala sila maminaw sa awhag sa mga sumasakay nga kun aduna sila’y mga wala mauyoni sa mga lagda sa pagpatuman sa kagamhanan dili kay ang katawhan maoy ilang isakripisyo.

Karong sunod Lunes, ang mga drayber sa mga passenger jeepney ug bus mitakda nga molusad na usab og welga pinaagi sa dili pagbiyahe sa mao’ng adlaw. Mao kini ang nahuna-hunaan nila nga paagi aron madunggan ang ilang reklamo sa kadagkoan sa kagamhanan.

Ngano nga ang mga drayber ra man sa mga public utility vehicles, ilabi na ang PUJ’s, maoy nahadlok sa dagko nga multahan nga gipatuman sa Department of Transportation and Communications? Ang mga nagmaneho og kotse ug ubang sakyanan wala man lagi mahadlok?

Sabton ba kini nga nahadlok ang mga drayber og public utility vehicles sa dagko nga multahan kay malapason sila sa balaod?

Ang mga drayber nga magbinuotan sa ilang pagmaneho ug motuman lang gayud sa balaod sa trapiko dili gayud madakpan. Apan kadaghanan sa mga drayber og PUJ kanunay’ng madakpan kay sila mga abusado o kaha wala makasabot ug masayod sa mga lagda.

Isip usa ka responsable nga drayber, kinahanglan nga sila magtuon ug nakasabot sa mga lagda sa pagmaneho og sakyanan dili kay makontento ra nga makamao sila mopadagan apan ignorante sa balaod ug tungod niini kanunay sila nga madakpan.