Kabahin sa demokrasya nga pangagamhanan

Dili kalikayan sa mga lider nga aduna g’yuy mosupak sa ilang desisyon ug angay nila kini nga sabton kay kabahin kini sa demokrasya nga pangagamhanan.

Sa Toledo City, gikiha si Mayor John Henry “Sonny” Osmeña sa iyang mga konsehal kay misupak sa iyang desisyon.

Sa Cebu City kontra kaayo si Mayor Michael Rama sa kadaghanan sa iyang mga  konsehal kaniadto, apan karon nga nasinati na nila nga tinarong ang iyang pagdumala sa dakbayan, medyo mialalay na kaniya ang ubang mga konsehal.

Sa Talisay City nasugamak si Mayor Johnny De los Reyes sa mga pagsaway sa iyang mga kritiko tungod kay wala niya ilista ang mga ngalan sa uban niya’ng mga paryente sa iyang 2013 Statement of Assets, Liabilities and Net Worth (SALN).

Sa kalabaka ni JVR, gipasusi niya ni Talisay City Legal Officer Alfredo Sipalay ang buhatan sa Public Assistance Corruption and Preventive Office sa Ombudsman-Visayas ug gikonsulta ang isyu.

Miingon si Mayor JVR nga ingon og nahuwasan siya sa kakuyaw ug sama ra sa naibtan siya og tunok, diha nga ilang nasayran gikan sa buhatan sa Ombudsman nga wala’y iregularidad nga nahimo sa dili niya paglakip sa ubang ngalan sa iyang mga paryente sa iyang SALN.

Hinuon usa sa iyang duha ka anak nga nahilakip sa iyang SALN mao si John Yre De Los Reyes, ang Talisay City administrator, nga nakahuman og daghang kurso nga takus mogunit sa katungdanan.