Sa basket gihapon
“Grabe pa gyud ang pagka-basketball crazy natong mga Pinoy,” matud pa ni Sir Jacobo Diaz, 65, retiradong college basketball coach gikan sa Davao. “Wa pa gyud ta matakdi sa kagaw sa soccer football nga maoy sport nga gikabuangan sa mga Uropanhon.”
* * *
Sir Jacobo mihimo sa maong obserbasyon samtang siya ug iyang mga katalirongan sa Labangon nagtan-aw sa Game 5 kon championship game tali sa San Mig ug Rain or Shine adtong miaging Miyerkules sa gabii.
* * *
Ang maong PBA game midani og kapin sa 35,000 ka basketball fans sud sa Smart Araneta Coliseum. Grabe ang sinyagitay sa mga tumatan-aw. Dili na usahay madungog ang pito sa mga reperi.
* * *
Matud pa ni Sir Jacobo, bisan pa nga nagpadayon sad ang World Cup football didto sa Brazil diin midani og atensyon sa minilyon ka mga soccer fans sa tibuok kalibutan ang Pinoy wa gihapon mahaylo niini.
* * *
Adtong Miyerkules sa gabii, ang mga bay ug tindahan nga dunay tv sa hapit tanang dapit sa dakbayan napuno og basketball fans kinsa wala lang misinggit alang sa ilang gipaboran nga koponan nagpinustaanay pa gyud.Diin kini midugang sa kasibot ug sa kaalegre sa mga dumadapig.
* * *
O, tuod diay, ang San Mig Coffee Mixers maoy nidaug ug nahimong kampeyon batok sa Rain or Shine Painters adtong gabhiuna.
- Latest
