Procurement Law daghang naapektohan
Daghang naapektohan niining Procurement Law. Ultimong binulang pensiyon sa retiradong sundalo, kinsa higala ning tagsulat, puwerteng dugaya ihatag. Sa pagsulat niini, matud niya, wa pa gyod siya makadawat. Laing amigo ning tagsulat, kinsa miretiro na sa iyang serbisyo, tingale, may 6 ka bulan na ang nakalabay, bisan usa ka sentimo, wa pay nadawat. Unsay rason? Tungod sa Procurement Law!
May pipila ka kompaniya sa gobiyerno nga ultimong toilet paper wala nay ikapalit. Hasta mineral water nga alang sa empleyado ug kustomer, wala nay ikadalit. Unsay rason? Tungod sa Procurement Law!
Dili kay tissue paper o tuig ray nawala. Hasta pipila ka empleyado ang nangawala. Kay wala na man silay trabahoon, ilang serbisyo wala na sab kinahanglana sa kompaniya. Unsay rason? Tungod sa Procurement Law! Paita. Imbes sulbaron ang unemployment problem, gipun-an hinuon.
Matud pa nila, ang Procurement Law nindot kuno. Kay makababag ni sa pagpangurakot. Mao ba? Unya, nganong daghan man gihapong politiko ang nakasuhan sa pagpangurakot? Sa ato pa, dili diay ni epektibo? Wala diay nada? Unya, nganong ipadayon pa man kini? Maayo ning hunongon, uy!
Makadaghan na ta makadungog nga ang tumong sa gobiyerno ning pag-implementar sa Procurement Law, usa kini ka pamaagi nga masunod ang gipanghambog nga: “Matuwid na daan.” Pero kahibulongan: Kay imbes mga puting pako sa anghel ang motubo sa kinaiya sa tawo, mga sungay sa demonyo man hinuon. Nagpasabot ba kini ang ‘Matuwid na daan’ nga gustong ipasubay sa gobiyerno mao ang ‘Matuwid na daan papuntang impiyerno? Oh, my dear countrymen, please wake up!
- Latest
