Makapuypoy ang pagpaubos

Sa lawom nga pamalandong ni Padre Romeo Obach sa kontrobersiya nga iyang nahiagoman tungod sa pagkatap sa video sa iyang pagpanginsulto atol pagpamunyag  og bata niadtong Domingo, hinaot nga natugkad na niya nga abunda ang mga sukaranan sa pagpasidungog inay pagtunglo sa batan-ong inahan:

Nipili siya pagpakatawo sa bata bisan nisuway unta paghikog human nahibaw-i nga may laing babaye ug di manubag sa responsibilidad ang iyang hinigugma;

Gihangop niya ang bata ug wa itago ni giisip nga simbolo sa kauwawan sa dako niyang kasaypanan; ug

Gipabunyagan niya ang bata sa Simbahang Katoliko bisan sa kahigayonan nga mainsultohan siya sa mga parokyano ug mga pari sama ni Padre Obach.

* * *

Sa pikas nga bahin, angay sang hatagan og kredito si Padre Obach sa iyang pag-angkon dayon og responsibilidad sa kasaypanan ug pagpangayo dayon og pasayloa sa batan-ong inahan ug sa tanang nakakita sa di maayo niyang binuhatan. Kay sayon unta kaayo alang sa pari ang paghimo sa mosunod:

Pagtago ug pagpakahilom, pasagdan ang publiko nga mapul-an sa pagpanaway niya ug paghuwat nga mahilom nang isyu o may makit-an ang mga tawo nga mas bag-o ug mas dakong kontrobersiya;

Pag-insistir nga sakto ang iyang gihimo apan giputol lang ang video sa iya nang paghatag og mga pagtulon-an sa mga nanambong sa bunyag; ug

Pagkuwestiyon sa pag-upload sa video sa social media ug pagduda nga gi-edit ang iyang mga gipanulti.

* * *

Angay sang pasalamatan ang kapariang Redemptorista sa Sugbo. Wa sila magpasalipod sa kaligdong ug kadugay sa ilang institusyon ug sa kadaghan sa maayo nilang mga buhat alang sa mga kabos, mga masakiton ug mga gipanggukod. Giangkon dayon nila ang dakong kasaypanan nga nahimo sa ilang sakop. Ug nipasalig dayon og dinalian ug matinud-anon nga imbestigasyon sa kaso ni Padre Obach.

Hinaut nga di sila kutob lang sa sulti. Hinaut nga pahibaw-on dayon ang mga biktima ug ang publiko sa sangpotanan sa ilang imbestigasyon. Ug unsa ang tukmang silot nga ipahamtang batok sa pari.

* * *

Salamat sa pag-angkon sa sayop ug pagpangayo dayon og pasaylo nilang Padre Obach ug sa mga Redemptorista dali rang mahusay kining maong kontrobersiya. Wa na kinahanglana nga gastuhon pang dugang emosyon sa init nga binayloay. Kay wa nay lalis may pagpakauwaw ba gyung nahitabo ug kun kinsay responsable.

Di man tingali hingpit nga makaalim apan makapuypoy sa masuk-anong mga kasingkasing ang pagpaubos sa kaparian. Mahimong may mga kaso gihapon nga mapasaka sa hukmanan. Apan ang pag-angkon sa sayop ug pagpangayo og pasaylo makapahawan na sa agianan sa mga paningkamot nga kahatagan og hustisya ang mga biktima, kasilotan ang sad-an ug labaw sa tanan mahimoan og mga lakang pagtino nga kalikayan ang susamang mga panghitabo sa umaabot. [email protected]