Ginadili nga drugas walay hubas-hubas

Kun sa DySS Super Radyo ang bugas “walay hubas-hubas,” sa Central Visayas ang ginadili’ng drugas wala po’y hubas-hubas. Kini base sa kalampusan sa sunod-sunod nga operasyon sa kapolisan.      Sa Central Visayas, mora’g dili na mabangbang ang gidaghanon sa ginadili’ng drugas tungod kay wala gayud kini mohubas bisan sa sunod-sunod nga operasyon sa kapolisan.

Gani kun imong ibasi sa kantidad sa ginadili’ng drugas nga nasakmit ug sa gidaghanon sa mga tawo nga nalambigit niini, imong makita nga sama sa wala magsilbi ang kampanya sa gobiyerno batok sa ginadili’ng drugas.

Base sa talaan sa kapolisan sa Central Visayas, mokabat sa P37.9 milyones ang balor sa ginadili’ng drugas nga nasakmit sa kapolisan sa 883 nila ka anti-drugs operation diin 1,143 ka suspetsado ang nag-atubang na og mga kaso.

Sa upat ka lalawigan nga sakop sa Central Visayas, ang Bohol maoy nag-una kay matud pa didto masakmit ang labing dako nga balor sa shabu nga miabot og P6.8 milyones resulta sa 111 ka operasyon sa kapolisan gikan sa Enero ngadto sa Mayo ning tuiga.

Nagsunod sa Bohol mao ang lalawigan sa Sugbo nga adunay P2.9 milyones nga kantidad sa ginadiling drugas nga nasakmit resulta sa 278 nila ka operasyon nga misangpot sa pagkasikop sa 382 ka suspetsado diin 273 ka kaso ang napasaka.

Kini hinuon naglakip niadto’ng mga P6 milyones nga kantidad sa shabu nga dinhi masakmit sa dakbayan sa Sugbo pinaagi sa mga sakop sa Philippine Drug Enforcement Agency (PDEA) sa miagi’ng buwan.

Ang mga polis sa Negros Oriental nakasakmit usab og ilegal nga drugas nga mobalor og P2.5 milyones sa 111 nila ka mga anti-drugs operation ug mipasaka sila og 146 ka kaso batok sa 147 ka suspetsado nga ilang nadakpan.

Ang kapolisan sa Siquijor nakasakmit usab og ginadili’ng drugas nga mobalor og P2 mil sa upat nila ka operasyon nga miresulta sa pagkasikop sa tulo ka suspetsado ug sa pagpasaka og unom ka kaso.

Sa upat ka lalawigan nga sakop sa Central Visayas, ang Siquijor mao ang adunay labing gamay og balor sa drugas nga nasakmit ug labing gamay nga anti-drugs operation nga gipahigayon. Seguro gamay lang ang ginadili’ng drugas didto sa Siquijor o ba kaha tapolan lang ang mga polis didto.