Iglesia ni Cristo centennial year
Gipangandaman sa tanang Katoliko ang pagduaw ni Sto. Papa Benedict XVI dinhi sa Pilipinas karong sunod tuig.
Gitakdang moduaw siya sa mga lugar nga nakasinati og dako’ng kadaot sa linog kaniadto’ng Oktubre 18 ug sa bagyo’ng Yolanda kaniadto’ng Nobiyembre 8.
Mahinamon nga gipaabot ang Santo Papa sa kadaghanan sa 95 milyones nga populasyon sa Pilipinas - kinsa mga sakop sa Romano Katoliko.
Samtang ang tuig 2014 gideklarar ni Presidente Aquino nga “Iglesia ni Cristo Centennial Year” base sa Presidential Proclamation 815 nga gipatik sa Pahina 3 sa The Philippine Star niadtong Hulyo 5.
Ang Iglesia ni Cristo Centennial Year saulogon sa tibuok kalibotan unya sa Hulyo 27.
Sa maong higayon subhan o inugurahan usab ang labing dako nga mega dome arena sa tibuok kalibutan nga mao ang Philippine Arena nga nahimutang sa Bocaue, Bulacan nga adunay 55 mil ka lingkoranan.
Ang minilyon ka miyembro sa INC mapasalamaton nga nakadangat sa iyang ika-usa ka gatos ka tuig ang maong pundok nga gisugdan og sangyaw ug girehistro sa kagamhanan ni anhing Igsoon o Kapatid nga si Felix Manalo kaniadtong Hulyo 27, 1914.
Ang minilyon ka pesos nga kantidad sa iyang mga kapilya sa tibuok kalibutan nakadugang og nindot nga talan-awon sa Pilipinas.
Mayoridad sa mga sakop sa INC gikan sa Katoliko ug Protestante ug tinuod ang giingon ni Presidente Aquino nga ang Iglesia ni Cristo dako og natampo sa kalamboan sa nasud. Sa natad sa ekonomiya nakatampo ang mga miyembro sa INC kinsa bisan mga kabus apan nanginabuhi pinaagi sa panarbaho ug ang mga dagko’ng kompaniya nga gitrabahoan niini miasenso ug nakatampo sa pagpapalambo sa ekonomiya sa Pilipinas.
Kabahin sa isyu sa kahusay ug kalinaw dako usab og natampo ang mga sakop sa Iglesia ni Cristo kay sila mahigugmaon man sa kalinaw ug maoy gipatigbabaw ang paghigugmaay.
* * *
- Latest
