Tentasyon sa Android
Gipahibawo na sa Google ang labing bag-ong update sa ilang operating system, ang Android L. Giputol ang ilang tradisyon paghingan sa OS sa kinaham nga tam-is nga mga pagkaon. Gipasalig nga gawas nga mas nindot tan-awon kay sa Kitkat, Jelly Bean, Ice Cream Sandwich, Honeycomb, Gingerbread, Froyo, Eclair, Doughnout, Cupcake, Android beta ug Android alpha, mas paspas ug mas mapuslanon pa gyud.
Uban ang panganti nga mas modako nang ilang labaw sa Apple, Microsoft ug ubang karibal, mga inhinyero sa Google nipasalig og laing dagkong kausaban: Mas taas og lahutay ang bateriya ug katakos pagbasa sa USB ug external memory cards.
* * *
Apan karon pang Septiyembre ang labing sayong banabana sa pag-abot sa Android L. May mga pangagpas pa gani nga Oktubre na gyod makarga sa bag-ong tablets ug mobile phones nga ipagawas sa Samsung, LG, Asus ug ubang mga kompaniya pagdani sa mga mamalitay sa Pasko ug Bag-ong Tuig.
Maong nadani ang akong pagtagad sa mga pangangkon nga mas sayong makakuha sa Android L ang gituli (rooted) nga Nexus 5 ug Nexus 7. Nexus 4 pang akong telepono. Maong kinahanglan pa kong magpaabot. Apan nanguhit na sab nako ang mga panghaylo nga bisan di pa nako makuha ang bag-ong OS, maggamit na nako ang Android L theme ug apps. Nitagam na hinuon ko pagpatuli sa akong telepono.
* * *
Di na kong kaihap sa higayon nga nikaging ning akong Nexus 4. Nakanindot hinuon sa Android mao nga bisan unsa pay daot maayo ra gihapon kun imong i-reboot. Apan dihang natental ko pagsuway sa Cyanogenmod, ang alternatibong OS nga nipasalig nga mas moabtik ug mas mapuslanon ang akong telepono, sangko sa langit ang akong pagmahay.
Niandar pang akong Nexus 4 apan napawong ang internet ug bluetooth. Diha pa kong kabasa nga kinahanglan pa diay’ng i-downgrade ang akong Nexus 4 aron motakdo sa labing bag-ong Cyanogenmod. Uwahi nang tanan. Kutob na lang ko sa text ug tawag.
* * *
Naayo sa akong higala nga taga Dumaguete ang akong telepono pinaagi sa sideloading. Wa na ko magsusi unsaon ug hugot nga nisaad sa akong kaugalingon nga mohunong na og gukod sa bag-ong mga tanyag ug maghuwat na lang sa opisyal nga updates sa Google.
Hangtod sa madanihong tentasyon sa Android L. Na-download na nakong bag-ong keyboard nga mas daghan og emoji apan ang ubang apps nagkinahanglan og rooted nga Nexus 4. Nagpaibog ang XDA developers nga kun hikapong icons sa Android morang papel nga maalsa gikan sa lamesa. Gilili nako ang komplikadong mga lakang pagtuli na sab sa akong Nexus 4. Apan napugngan pang akong kaugalingon. Makakita gani ka nakong minghoy og dagway ug bayhon, mahimong natental ug nikaging na sang akong telepono.
* * *
- Latest
