Kinsay may katungod sa bata kun magbuwag ang magtiayon?

Dear Atty. Divine,

Usa ko sa nagsunod sa imong lindog sa Banat News, lakip na sa imong programa nga Sayri 47 sa CCTN. Ang akong pangutana may labot sa problema sa akong ig-agaw. Kasal ni sila sa inahan sa iyang anak apan wala sila’y gugma sa usa’g-usa, napugos lang kini sila og pakasal tungod kay nabuntis ang babaye. Ang ako ‘sab nga ig-agaw nagpakasal kaniya tungod sa bata apan karon iyang namatikdan nga dunay laing lalaki ang babaye. Ang akong pangutana atorni kun magkabuwag sila, asa man ang bata? Dunay trabaho ang akong ig-agaw samtang ang babaye wala? Maka-file ba og Annulment ang akong ig-agaw? Unsa may angayan niya nga buhaton? -  Ana

Dear Ana;

Base sa atong balaod, kun ang magtiayon magbuwag unya duna sila’y mga anak, kun ang bata nagpangedaron pa lang og 7-anyos paubos, ang custody sa bata adto g’yud sa inahan. Apan ang amahan mamahimo’ng modangop sa Korte aron pangayuon nga itugyan kaniya ang parental authority ug custody sa bata kun aduna siya’y lig-ong basehan nga madeklarar nga unfit ang inahan nga mo-custody sa bata, sama pananglit sa pagka immoral sa inahan, pagka addict, way trabaho or iyang gi-abandonar ang bata ug uban pang basehan. Apan kining tanan moagi sa korte kay ang tan-awon niana sa huwes kun unsay mas makaayo sa bata. Kun magbuwag sila, mamahimo nga mopasaka og Annulment or Declaration of Nullity of Marriage ang imong ig-agaw. Apan sa dili pa kana niya buhaton mas maayo nga moadto una siya og abogado aron matun-an kun unsay mamahimo’ng grounds kon basehan sa pagpa-annul sa iyang kaminyoon. Daghang salamat ug God Bless. - Atty. Divine

Alang sa inyong pangutana, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyo’ng pangutana matag Miyerkules ug Domingo pinaagi sa akong column.