Hanap ang tsansa

Mitumaw karon ang mga panawagan alang sa impeachment ni Presidente Benigno Aquino III nunot sa dakong kontrobersiya nga dala niining iyang Disbursement Acceleration Program kon DAP.

Kini sa dihang gideklara sa Korte Suprema sa niaging semana nga unconstitutional ang DAP. Kini nagpasabot usab nga ilegal diay ang pagpang-apod-apod ni PNoy og milyones ngadto sa mga senador.

Kahinumdoman nga pipila ka administration senators ang nakadawat og milyones gikan sa presidente. Adunay mga alegasyon nga pahumot kini gikan sa Palasyo ngadto sa mga senador kinsa mibotar alang sa impeachment ni kanhi Chief Justice Renato Corona.

Alang kuno kining maong DAP sa mga nagkalain-laing proyekto sa mga senador. Tungod kay mando man sa Malacañang, tulin pa sa eroplano nga nakatugot niini ang Department of Budget and Management.    

Karon mitingog na ang Labaw’ng Hukmanan. Ug kay ilegal na man ang pag-distribute sa maong pondo, kinahanglan lamang nga iuli sa mga senador ang maong salapi ngadto sa kaban sa lungsod.

Human gideklara sa Korte Suprema nga ilegal ang DAP, daghan ang naglaum nga adunay manubag niini. Apan kun si kinsa ang angay nga silotan niining maong binuang, mora’g tak-om ang baba sa mga anaa sa poder.

Bisan kun si kinsa pa ang pangutan-on, ang administrasyong Aquino maoy manubag niining maong bulilyaso. Ug ang dakong mahasngan mao gayud mismo si DBM Secretary Florencio Abad, ang giingong arkitekto sa DAP. Hinuon dakong pangutana usab kun mosaler ba ang impeachment complaint batok sa presidente gumikan sa DAP. Nahibalo kita nga mayoridad sa mga sakop sa Ubos Balay Balauranan mga kaalyado man sa presidente.

Basi niini, wala gayuy tsansa nga mokaliring pa ang impeachment complaint ngadto sa hawanan sa Senado. Kini tungod kay dili gayud kini maka-first base diha sa Ubos Balay Balauranan.

Bisan pa kun maduso kini sa Senado, ngit-ngit pa sa alkitran ang tsansa nga modaug ang impeachment complaint. Gumikan lagi kay mayoridad sa mga senador kaalyado man ni PNoy, sayon ra kaayo kining igkon.

Mao kini ang realidad sa politika dinhi sa nasud. Kun si kinsay anaa sa gahum, klarong maoy hari.