Unsa g’yuy tinuod?

Dili g’yud bitaw makiangayon kadto’ng paghatag og ‘tag P20 mil sa matag usa ka opisyal ug kawani sa Cebu City Hall kaniadto’ng Disyembre nga gipatuo nila nga calamity financial assistance ug gikuha gikan sa calamity fund.

Bisan og gibalik-balik pa nila ni Mayor Michael Rama ug Vice Mayor Edgardo Labella nga may katungod ang usa ka Local Government Unit (LGU) sa pagtabang sa ilang mga opisyal ug kawani nga nabiktima sa katalagman, ang tinuod wala mahiagom og katalagman ang mga hingtungdan.

Ang katalagman nga gipasabot mao kadtong gitay-og ang Sugbo sa linog sa miaging Oktobre 18 ug kadtong pag-igo sa bagyo’ng Yolanda sa Kabisay-an kaniadtong Nobiyembre 8. Aw gawas tingali kun isipon na nga nabiktima ka sa katalagman kun ang imong balay makabatyag lang nga motay-og tungod sa linog ug nga kun huypon kini sa hangin gumikan sa bagyo.

Ang tinuod, nabatasan na sa kagamhanan sa dakbayan nga manghatag gayud og Christmas bonus sa mga opisyal ug kawani panahon sa Disiyembre. Gawas nga nihit ang kuwarta sa dakbayan sa miagi’ng Disiyembre, aduna pa’y laing problema kun mohatag sila og “cash bonus.”

Adunay lagda nga ang mga highly-urbanized city sama sa dakbayan sa Sugbo mogasto lang og dili mosubra sa 45 porsiyento sa iyang Annual Budget alang sa gitawag og “personal services” kun sweldo, allowances ug uban pa nga monetary incentives sa mga kawani.

Kun ang P84 milyones nga ipanghatag sa kapin sa P4,200 ka opisyal ug kawani sa City Hall ingnon nga “Christmas bonus” molapas na ang City Hall sa gitugot nga gastohan alang sa “personal services.”

Mao kini ang rason nga ang tag P20 mil nga “Christmas bonus” giingon lang nga “calamity financial assistance” ug didto gikuha sa calamity budget. Sabtan ba ninyo?

Buyno, sila si Mayor Rama ug Vice Mayor Labella, miingon man nga nasubay sa balaod ang ilang gihimo, paabuton lang nato kun unsa’y lintunganay niini nga isyu.

Karon, may kaso na nga gisang-at si Atty. Reymelio Delute didto sa Office of the President sa Malacañang. Wala hinuon siya makapasabot kun ngano nga duna may mga konsehal nga wala niya iapil.

Nahibaw-an hinuon nga apil sa wala giapil mao sila si Konsehal Margot Osmeña ug Lea Japson kay wala man sila modawat sa calamity assistance kay mauwaw.