EDITORYAL - PDEA maayo’ng wad-on

Sa gihimo nga sunod-sunod nga pagpangronda sa kapolisan sa mga tigpayuhot og gidili’ng matang sa drugas ug daghan na sila og kalampusan, angay’ng mauwaw niini ang mga sakop sa Philippine Drug Enforcement Agency.

Ang PDEA gimugna aron mohimo unta og hugtanay nga kampanya batok sa mga tawo nga nalambigit sa pagpamaligya ug sa mga maghupot og ilegal nga drugas, apan nagyugpos lang sila ug walay  nahimo.

Anam-anam na nakatuo ang katawhan nga ang PDEA nagyugpos lang sa ilang mga bukton tungod kay kadaghanan kanila nabayran na sa ilang mga dakponon.

Dili ra kay ang mga sakop sa PDEA ang walay gihimo sa pagkuyanap sa ilegal nga drugas kun dili, apil ang pipila ka tanod. Napamatud-an kini diha nga ang mga tanod sa Barangay Duljo-Fatima wala moabag sa kapolisan nga nangronda og balay sa pushers sa ilang dapit.

Isip mga tanod sila maoy mga Agents to Persons in Authority diha sa ilang barangay ug angay sila nga moabag sa mga polis kay pareho ra sila nga ubos sa pagdumala sa Department of Interior and Local Government.

Ang sunod-sunod nga kalampusan karon sa kapolisan sa kampanya batok sa drugas nahimo kini diha nga miasumer sa katungdanan si Chief Superintendent Prudencio Tom Bañas isip bag-o nga regional direktor sa kapolisan sa Central Visayas.      

Nagpasabot kini nga ang kapolisan kuwang ra g’yud diay og direksyon gikan sa ilang mga labaw. Kun ang PDEA magpabilin nga walay maayo’ng labok mas maayo pa nga wad-on kining mao nga kahugpongan nga walay pulos.

Daghan hinuon ang nabalaka kay basin og ang subsob nga pagpangronda karon sa kapolisan maisip lang nga “Oplan Pakilala.”