Plaster sa Ban-Tal

Dakong problema sa eksperimento ni Cebu City Mayor Mike Rama sa Banilad-Talamban Road, gawas sa kakuwang sa konsultasyon ug pahibawo sa publiko, mao nga ang feedbacks ra nga pabor nila ang ilang gipaminaw. Pulos nipasalig silang City Traffic Operations Management (Citom) Executive Director Raphael Yap ug Citom Operations Chief Joy Tumulak nga mas nihapsay ang trapiko sukad sa paglusad sa eksperimento.

Niangkon si Yap nga “anecdotal” ang feedback nga ilang nadawat. Kasagaran gikan sa text sa ilang mga higala. Hinaot nga abli pang ilang hunahuna sa kasayurang nisukwahi sa ilang gituohan. Aron nga ang bisan unsang sulbad nga ipatuman magtugkad sa yuta di sa tumoy lang sa ilang buhok.

* * *

Kun ang konsultasyon nga gihimo ni Rama ang basehan way luna ang lahi nga mga panghunahuna. Giputol niya ang sulti sa mga nangahas pagbarug pagkuwestiyon sa eksperimento. Gibadlong ang mga nisuway pagpanaway pinaagi sa pagpahinumdom nga ang konsultasyon alang sa mga sulbad.

Kay siya man ang nagkontrolar sa kalihokan way nitumaw nga bag-ong mga ideya. Ang tuyo sa konsultasyon di diay paghatag og higayon sa tanang hingtungdan sa pagtingog. Kun dili ang pag-awhag diay nila pagsalig sa sulbad nga nahunahunaan sa mayor. Bahala na kun ang iyang mga suod nihulagway sa eksperimento nga pagmugna og krisis aron mapugos ang tanan pagsulbad sa dugay nang problema sa trapiko.

* **

Niay “anecdotal” nga feedback gikan sa usa sa mga motorista nga taguon lang nato sa ngan nga Dave Karamihan, kanhi konsehal sa Balamban nga naa magpuyo sa Maria Luisa Subdivision sa Barangay Banilad sa Dakbayan sa Sugbo:

Nagdungan siya ug iyang asawa pagbiya sa ilang bay. Iyang asawa nisungasong sa Ban-Tal aron paghatod sa ilang anak sa Ateneo de Cebu sa Canduman, Dakbayan sa Mandaue. Samtang siya nitungas sa Trans-Central Highway ug nakigkita sa mga molupyo sa bukirang barangay sa Gaas, Balamban. Nahibalik na lang si Karamihan sa ilang bay, wa pa moabot ang iyang asawa gikan sa Ateneo.

* * *

Tungod sa akong pangedaron ug sa pagpatugatuga pagtabang pagsakwat sa relief goods nga natigom sa Kapamilya Relief Campaign, nisakit ang akong abaga, nga human sa pila ka adlaw di na nako malihok. Ginganlan ni Dr. Jorgen Lim ang akong kahimtang nga “frozen shoulder” ug gipaubos ko niya og therapy.

Human sa usa ka therapy session, nipauli ko sa bay nga nagping-it kay nikaging nang akong abaga. Gihatagan ko sa akong asawa og plaster. Nga nihatag nako og mas grabe pa gyong sakit. Mao nga sa gusto nako o sa dili, nakalimtan ang orihinal nga sakit. Hinaot nga ang eksperimento ni Rama mas maayo kay sa plaster sa akong asawa. Ug di igo lang mopasa sa laing dapit sa mas grabe pang problema.

[email protected]