Tag-iya sa multicab gihatagan og tagal pagbayad

Dear Atty. Divine,

Naa ko’y multicab, wala na nagdagan kay nadaut ug gipaayo sa akong paryente aron kuno ipabiyahe og mag-rent siya sa ako og P500 per day. Sa naayo na ang multicab nausab iya offer kay iya na lang utangon og P100 mil apil ang franchise ug mag down siya og P10 mil ug  ang P90 mil iya nga bayran sud sa three months apan wala siya motuman. Giusab na ‘sab niya ang offer, iya kuno iuli ang franchise then utangon na lang niya ang multicab og P50 mil, unya ibanon ang P10 mil, ang P40 mil bayran for 3 months. I accept his offer again, but almost two years na, P5 mil ra’y nabayad. Ako siya gipaningil wala kuno siya’y ikabayad. Ako siya giingnan nga ulian na lang nako siya sa pagpa-repair. Nisugot siya but gusto niya nga bayran nako siya within this week. If dili daw ko makabayad iya ibaligya sa lain. Naa ba siya katungod nga iya ko tagalan sa pagbayad nga ako man ang tag-iya? Puwede ba diay niya mabaligya ang unit nga wala man mi gipirmahan nga deed of sale ug wala pa man mausab ang registration?  Puwede ba makuha nako ang multicab before nako siya bayran sa iya nagasto? Hinaut imo ko’ng matubag. — Joven

Dear Joven,

Kun siya mismo napakyas pagtuman sa iyang saad pagbayad sa imong multicab, karon nga nakadesisyon ka nga ulian na lang siya sa iyang nagasto, way rason nga iya ‘sab ka nga dali-dalion. Mora man og nag-abuso na siya kanimo. Kun wa mo’y gipirmahan nga Deed of Sale ug ang rehistro sa sakyanan nagpabilin pa sa imong pangan then dili kini mahimo niya’ng ibaligya kay kun iya kanang buhaton mahimo siya’ng makiha. Mas maayo nga imo na lang siya’ng i-refund sa iyang nagasto pagpaayo apan kanang iyang kondisyon nga kinahanglan bayran siya dayon mamahimo man na ninyo’ng sabutan. I don’t think nga iyang iuli ang multicab kanimo samtang di pa ka makabayad kaniya. Ang maayo nimong buhaton imo lang siya hangyuon kun kanus-a ka posible’ng makabayad kaniya apan kun di g’yud mo mahusay then mapugos g’yud ka sa pagdangop sa barangay.- Atty. Divine

Kun duna mo’y pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyo’ng pangutana matag Miyerkules ug Domingo pinaagi sa akong lindog.