Unsay status sa kawani sa bag-ong management?

Dear Atty. Divine,

Usa ako sa nagsunod sa imong lindog sa Banat News.  Employee ko sa usa ka kompaniya. Magpatambag unta ko nimo sa amo’ng problema tungod kay ang among kompaniya nag-ilis man og bag-ong pangalan ug possible nga bag-o na ang management niini. Duna sila’y gipapirmahan namo nga personnel activity notice. Mopirma ba kami niini nga nakabutang man sa form for regularization and probationary? Makadawat ba kami sa amo’ng benefits base sa length of service? Duna ra ba mi kauban nga 32 years na nga nagtrabaho sa kompaniya. Unsa’y maayo namo nga buhaton attorney? Hinaut nga imo mi nga magiyahan. Daghang Salamat. –Ricky

Dear Ricky,

Kun bag-o na ang management sa inyong kompaniya, posible nga apil sa ilang gikasabutan nga i-absorb mo nga mga empleyado hinungdan nga ila kamo nga papirmahon. Apan sa dili pa kamo mopirma sa form nga ilang gihatag kaninyo, mas maayo nga inyo una nga basahon kun unsay mga terms and conditions nga nabutang niini. Pananglit wala gani maklaro kun unsay inyo’ng status sa bag-ong kompaniya mas maayo nga mangutana g’yud mo sa ilang Human Resource Department ug usa sa inyo’ng iklaro kun ang inyong length of service magpadayon ba or kun ila ba kamo’ng ikonsiderar nga bag-ong empleyado. Kun dili gani mapadayon ang inyong length of service angayan lang nga mangayo mo og separation pay sa karaan nga management nga inyo’ng gitrabahoan. Ang separation pay kasagaran equivalent na sa one month salary per year of service. Busa ang maayo ninyo’ng buhaton karon mao ang pagpakig-estorya sa ilang HR aron maklaro ang inyong status. Kinahanglan nga ipabutang g’yud sa kontrata kun aduna sila’y papirmahan ninyo nga magpadayon ang inyo’ng length of service gawas lang kun kamo bayaran og separation pay ug dayon ikonsider mo sa bag-ong management nga bag-ong empleyado.. Thanks and God Bless. - Atty. Divine

  Kun aduna kay pangutana may kalabutan sa problema’ng legal, ipadala lang sa Legal Corner sa Banat News sa V. Gullas Street, Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.