Ayaw ipamugos

Mihirit na usab kining nagpakaaron ingnong mga environmentalists sa ilang tinguha nga makagahin gayud ang kagamhanan sa dakbayan sa Sugbo og mga bike lanes sa nag-unang kadalanan niining siyudad.

Atol sa usa ka public hearing sa niaging semana, nangugat na usab kining grupo sa mga mahilig mobisikleta niining ilang paningkamot nga kahatagan usab sila og kaagian sa mga karsada. Hagbay ra kini nilang giduso.

Hinuon aduna nay proposed ordinance nga giduso diha sa City Council paggahin og mga bike lanes sa mga karsada sa dakbayan. Giumol kini ni Konsehal Maria Nida Cabrera, usa sa mga nag-unang environmental advocate ning siyudad. Apan dako usab nga pangutana kun mapasar ba kini sa konseho. Daghan usab ang mibabag niini kay delikado kuno kini alang sa mga magbisikleta, ilabina sa sitwasyon nga daghang sakyanan ang nagbagiyos sa karsada.

Bisan si Mayor Michael Rama dili gayud kumbinsedo sa ideya pagbutang og mga bike lanes sa nag-unang kadalanan sa atong siyudad. Nag-unang rason niini, matud ni Rama, mao ang hagip-ot nga mga karsada.

Dili ako eksperto sa road safety. Apan dako akong uyon sa baroganan sa mayor. Risgo gayud tuod kun magkuyog ang mga dagkong sakyanan ug mga bisikleta sa usa ka dalan nga hagip-ot sama sa kadalanan ning dakbayan. 

Hinuon dili imposible ang pagbutang og mga bike lanes dinhi sa Sugbo. Apan kinahanglan usa nga i-widen ang mga karsada sa atong dakbayan aron pag-accommodate sa mga bike lanes aron dili usab makompromiso ang mga dagkong sakyanan.

Sama pananglit didto sa mga progresibong siyudad sa Europa o sa Estados Unidos. Normal na nga talan-awon ang mga bike lanes didto tungod lagi kay kabahin man kini sa moderno nilang kadalanan.

Apan dinhi sa Sugbo, dili kini magsilbi tungod sa ka gamay sa atong mga karsada. Duol ra sa disgrasya kun matuman gayud ang pagbutang og mga bike lanes dinhi, ilabina ning nagpasulabing kultura sa atong mga drayber nga kanunay lamang nga nagdali.

Kadtong gusto mag-bike, adunay mga lugar nga layo kamo sa risgo sama sa kadalanan didto sa bukid. Ayaw na lamang ninyo ipamugos ang pag-okupar og lane sa kadalanan sa dakbayan. Sabta usab ninyo ang sitwasyon.